Túpqaraǵandyq jas anımator mıllıoner atandy

MAŃǴYSTAÝ OBLYSY. QazAqparat - Aqshuqyr aýylyndaǵy M. Ábdihalyqov atyndaǵy mektep-gımnazııasynyń 9-synybynda oqıtyn Azıza Nurlanqyzy mıllıoner atandy, dep habarlaıdy QazAqparat.

Táýelsizdiktiń 30 jyldyǵyn merekeleý aıasynda Qazaqstan Respýblıkasy Aqparat jáne qoǵamdyq damý mınıstrligi «Táýelsizdik urpaqtary» grantyn taǵaıyndaǵan edi. Qazaqstannyń mádenı murasyn tanymal etýge, halyqtyq mádenı dástúrler men ónerdi ilgeriletýge baǵyttalǵan jobalardy iske asyrýǵa arnalǵan baıqaýdyń «Mádenıet» salasyndaǵy grantyn túpqaraǵandyq jas daryn Azıza Nurlanqyzy oljalap, 3 mıllıon teńgeni jeńip aldy.

Mýltıplıkatsııa, anımatsııa jasaýmen aınalysatyn Azıza eńbek naryǵynda 72% suranysqa ıe bul mamandyqty 7-synyp oqyp júrgende tańdaǵan. Qazir ol osy baǵytta talmaı eńbektenip, ártúrli joǵarǵy dárejeli baıqaýlardan bas báıgeni qanjyǵalap júr.

«Sýretti bala kúnimnen salyp júrgendikten, ony sotkada túrli grafıkalyq baǵdarlamalardy qoldanyp salýdy úırene bastadym. Sodan bastap, men alǵash qyzǵýshylyǵym oıanyp, ata-anamnan grafıkalyq sýretterdi salatyn planshette jumys istegim keletinin jetkizgem. Ata-anam sózimdi jerge tastamaı, birden shyǵarmashylyq qoldaý bildirdi. Mýltıplıkator–mýltfılmder jasaıtyn sýretshi degendi bildiredi. Anımator keıipkerlerdiń syrtqy túrin anyqtaıdy. Qımylyn syzyp, sıýjettik jelimen jumys isteıdi. Oǵan tús pen qııaldy qosyńyz. Barlyǵy qosylyp siz kóretin mýltfılm, anımatsııalyq fılmdi quraıdy», - deıdi Azıza Nurlanqyzy.