Túpki maqsat — jahandyq tehnologııalyq landshaftta ornyqqan ozyq tsıfrlyq memleket qurý
ASTANA. KAZINFORM — Ozyq data-ortalyqtarda jumys isteıtin maman bolmasa, qarjy jelge ushatynyn umytpaýymyz kerek. Bul týraly Parlament palatalarynyń birlesken otyrysynda Memleket basshysy Qasym-Jomart Toqaev málim etti.
— Qýatty sýperkompıýterlerdi iske qosý bul baǵyttaǵy mańyzdy qadam boldy. Ol jasandy ıntellekti jónindegi teorııalyq tujyrymdardy memlekettik basqarýǵa, ekonomıkaǵa jáne ulttyq qaýipsizdikke arnalǵan qoldanbaly sheshimderge ulastyrdy. Degenmen jasandy ıntellekt mol qýat pen esepteý keńistigin qajet etedi. Dál osy sebepti «Derekterdi óńdeý ortalyqtarynyń alqaby» megajobasyn qolǵa alýdyń máni zor. Atalǵan joba álemdegi jetekshi BigTech-korporatsııalardy tartatyn joıqyn gravıtatsııalyq alańǵa aınalady. Úkimet bul mindetti aıryqsha baqylaýda ustaýy kerek. Onyń oryndalýyn udaıy qadaǵalap otyramyn, — dedi Qasym-Jomart Toqaev.
Osy oraıda Prezıdent qazir Jańa Jibek jolynyń joǵary tehnologııalyq haby retinde elimizdiń tsıfrlyq derbestiginiń irgesi qalanyp jatqanyn atap ótti.
— Bul rette eń qýatty kompıýterlerde, ozyq data-ortalyqtarda jumys isteıtin maman bolmasa, qarjy jelge ushatynyn umytpaýymyz kerek. Sondyqtan bolashaq arhıtektorlary men baǵdarlama ázirleýshilerin mektep partasynan bastap daıarlaýǵa kiristik. Alem.ai halyqaralyq jasandy ıntellekt ortalyǵynyń janynan eki ınnovatsııalyq mektep ashyldy. Osy oqý jylynda Jasandy ıntellekt ýnıversıteti ashylady. Bul — atalǵan salaǵa maman daıarlaıtyn Ortalyq Azııadaǵy tuńǵysh arnaýly oqý orny bolmaq. Tsıfrlyq transformatsııa degenimiz — joǵarydan tómen qaraı barlyq basqarý tarmaqtaryn, tipti halyqtyń basym bóligin qamtıtyn ashyq ári qarqyndy úderis. Qazirdiń ózinde joǵary laýazymdy basshylardan bastap aýyl ákimderine deıin on myńdaǵan memlekettik qyzmetshi osy salalyq bilim berý baǵdarlamasyna qatysyp jatyr. Biz memlekettik basqarýdyń logıkasy men fılosofııasyn túbegeıli ózgertýimiz kerek. Ádettegi bıýrokratııadan arylyp, tıimdiligi joǵary «Memleket-platforma» (GovTech) servıstik paradıgmasyna batyl túrde kóshýimiz qajet. Túpki maqsatymyz — jahandyq tehnologııalyq landshaftta ornyqqan, ulttyq múddeni tabandy túrde qorǵap, ilgeriletetin, azamattaryna múltiksiz qyzmet etetin ozyq tsıfrlyq memleket qurý, — dedi Memleket basshysy.
Buǵan deıin habarlanǵandaı, búgin elordada Parlament palatalarynyń birlesken otyrysynda Prezıdent Qasym-Jomart Toqaev Quryltaıdyń aldynda qandaı mindet turǵanyn atady.
