Týpak Shakýrdyń ólimine qatysty is: 30 jyldan keıin aıyptalýshy 40 jylǵa sottaldy
ASTANA. KAZINFORM – AQSh-tyń Las-Vegas qalasyndaǵy sot 1996 jyly áıgili reper Týpak Shakýrdyń ólimine qatysty is boıynsha 63 jastaǵy Dýeın «Kıffı Dı» Devısti 40 jylǵa bas bostandyǵynan aıyrdy, dep habarlaıdy BBC.
Sot úkimi 13 qazanda jarııalandy. Buǵan deıin, tamyz aıynyń sońynda alqabıler Devısti birinshi dárejeli kisi óltirý qylmysyna kináli dep tanyǵan.
Úkimdi jarııalaǵan sýdıa Karlı Kırnı aıyptalýshynyń ótken ómirin artta qaldyrǵany týraly ýájin qabyldamady.
– Úsh jyl boıy sizden bir sózdiń túrli nusqasyn estidim: «Iá, men buǵan qatystym. Biraq qazir basqa adammyn. Ótkenimdi artta qaldyrdym. Komptonnan kettim. Qazir atamyn». Alaıda sizdiń bireýdi otbasynan aıyrýǵa, onyń ómiri men bolashaǵyn tartyp alyp, eshteńe bolmaǵandaı kete berýge quqyǵyńyz joq, – dedi sýdıa.
Týpak Shakýrǵa 1996 jylǵy 7 qyrkúıekte Las-Vegasta oq atylǵan. Reper mýzykalyq prodıýser Merıon «Shýg» Naıtpen birge kólikpen klýbqa bara jatqanda, janynan ótken basqa avtomobılden oq jaýdyrylǵan.
Aýyr jaraqat alǵan mýzykant 13 qyrkúıekte kóz jumdy. Al janynda bolǵan Shýg Naıt aman qaldy.
Dýeın Devıs osy qylmysqa baılanysty jaýapqa tartylǵan jalǵyz adam boldy. Prokýratýranyń málimetinshe, basqa adamdarǵa aıyp taǵýǵa jetkilikti dálel joq. Reperge oq atylǵan kólikte bolǵan degen taǵy úsh adam qaıtys bolǵan.
Devıs kezinde South Side Compton Crips qylmystyq tobynyń jetekshileriniń biri bolǵan. Al Shýg Naıt pen Týpak kelisimshart jasasqan Death Row Records kompanııasy qarsylas Mob Piru Bloods tobymen baılanysta bolǵan.
2019 jyly jaryq kórgen estelikter kitabynda Devıs Týpaktyń óziniń jıeni Orlando Andersonmen tóbeleskenin jazǵan. Sondaı-aq reperge oq atylǵan kólikte bolǵanyn jáne qylmysqa paıdalanylǵan tapanshany ózi bergenin málimdegen.
Alaıda 2023 jyly qamaýǵa alynǵannan keıin ol kitaptaǵy málimetterden bas tartyp, estelikterin aqsha men tanymaldyq úshin jarııalaǵanyn aıtqan.
– Sizder oqyp otyrǵan kitap – shyndyq emes, oıdan shyǵarylǵan dúnıe. Biraq aıyptaýshy tarap ony moıyndaý retinde qabyldatqysy keledi, – dedi Devıstiń advokaty Maıkl Sanft sotta.
Soǵan qaramastan, alqabıler ony qarý qoldaný arqyly birinshi dárejeli kisi óltirýge kináli dep tanydy.
Osy bap boıynsha eń aýyr jaza – merziminen buryn bosatý quqyǵynsyz ómir boıyna bas bostandyǵynan aıyrý.
Aıta keteıik, buǵan deıin Reseıdiń Sankt-Peterbýrg qalasynda reper Eldar Muratovty óltirgen prodıýser Ivan Zyrıanov 6,5 jylǵa bas bostandyǵynan aıyrylǵan bolatyn. Mýzykant eL'nix laqap atymen óner kórsetken.
