Týnıstiń burynǵy prezıdenti 22 jylǵa sottaldy

ASTANA. KAZINFORM — Týnıstegi sot eks-prezıdent Monsef Marzýkıdi syrttaı 22 jylǵa bas bostandyǵynan aıyrdy. Saıasatker – qazirgi Týnıs prezıdenti Kaıs Saıdtyń ashyq synshysy, dep jazdy DW.

Sot sheshimi týraly 21 maýsym, senbi kúni Reuters agenttigi habarlady. Qazirgi bılikke oppozıtsııadaǵy 79 jastaǵy Marzýkı memlekettik qaýipsizdikke qaýip tóndirdi dep aıyptalyp otyr. Ol qazir Parıjde qýǵynda júr.

– Meniń bul sýdıalarǵa aıtaryn: senderdiń úkimderiń zańsyz… Jaqynda senderdiń ózderiń sot aldynda bolasyńdar. Demokratııa qaıtyp oralady, – dedi Marzýkı úkimge baılanysty pikirinde.

Marzýkı 2011–2014 jyldar aralyǵynda Týnıstiń prezıdenti bolǵan. Ol Kaıs Saıdty parlamentti taratyp, avtorıtarlyq rejım ornatty dep aıyptap keledi. Al Saıd óz áreketterin el ishindegi turaqtylyqty saqtaý maqsatynda jasalǵan qajetti qadamdar dep túsindiredi.

Bul – Marzýkıge shyǵarylǵan úshinshi sot úkimi.

Týnıstegi ekonomıkalyq daǵdarys jáne saıası turaqsyzdyq

Týnıs birneshe jyldan beri ekonomıkalyq daǵdarys jaǵdaıynda ómir súrip keledi. Halyq kofe, sút, qant sııaqty negizgi azyq-túlikterge qol jetkizýde qıyndyq kórip otyr.

2021 jyldyń jazynda prezıdent Saıd úkimetti taratyp, parlamenttiń jumysyn toqtatty. Keıin ol jańa Konstıtýtsııa qabyldatyp, óz ókilettikterin keńeıtti. Alaıda, Reuters málimetinshe, Saıd bılikti kúsheıtkenine qaramastan, eldegi ekonomıkalyq jaǵdaıdy jaqsarta almady.

2023 jylǵy jappaı narazylyqtar

2023 jyly Týnıste prezıdent Saıdtyń otstavkasyn talap etken jappaı narazylyqtar birneshe ret ótti.

Kaıs Saıd prezıdenttikke 2019 jyly táýelsiz kandıdat retinde saılanyp, ekinshi týrda «Týnıstiń júregi» partııasynyń úmitkeri Nabıl Karýıdi jeńip shyqqan. Ol 72,71% daýys jınaǵan bolatyn. 2024 jyly qaıta saılaýǵa túsip, birinshi týrda-aq 90,69% daýys jınap, jeńiske jetti.