Týnıstiń birneshe óńirine jappaı tártipsizdikpen kúresý úshin ásker jiberildi
TÝNIS. QazAqparat – Týnıs bıligi ulttyq ásker bólimshelerin jeksenbi kúni keshke eldiń birneshe provıntsııalaryna memlekettik mekemelerdi qorǵaý jáne tártipsizdikpen kúresý úshin jiberdi. Bul týraly Mosaique fm radıostantsııasyna bergen suhbatynda Týnıs Respýblıkasy Qorǵanys mınıstrliginiń resmı ókili Mohamed Zekrı málimdedi, dep habarlaıdy QazAqparat.
«Qazirgi ýaqytta ásker bólimsheleri Sılıana, Kasserın, Bızert jáne Sýs provıntsııalarynda qoǵamdyq tártipti kúzetedi»,- dep atap ótti Qorǵanys mınıstrliginiń ókili.
Jeksenbide 16:00-de komendanttyq saǵat bastalǵannan keıin Týnıstiń keıbir provıntsııalarynda tártipsizdik qaıta bastalǵan. Kún saıyn Týnıste tártipke baǵynbaý áreketteri oryn alýda. Narazylyqqa qatysýshylar barrıkadalar turǵyzyp, avtokólik dóńgelekterin órtep, joldardy jaýyp, bılikke qarsy urandar aıtyp, óz áreketterin ashtyq tóńkeris dep ataýda.
Sonymen qatar, qaýipsizdik qyzmetkerleriniń aıtýynsha, jasy 25-ten aspaıtyn jastar toby dúkenderdiń terezelerin, kóshede turǵan kólikterdi qıratqan, sondaı-aq memlekettik mekemeler men qarjy uıymdaryn tonaǵan.
Senbiden jeksenbige qaraǵan túni respýblıkanyń ártúrli aımaqtarynda bolǵan tártipsizdikterge qatysqany úshin quqyq qorǵaý organdary 242 adamdy qamaýǵa aldy.
