Týnıstegi tóńkeristiń saldarynan 78 adam qaza tapty

Bılik ókilderiniń habarlaýynsha, olardyń qatarynda narazylyq bildirýshiler de, beıbit turǵyndar da bar. Eldiń ishki ister mınıstri Ahmed Frıaanyń aıtýynsha, taǵy 94 adam jaraqat alǵan. Kúsh-qýat qurylymdarynyń ókilderiniń arasynda da adam qurbandary bar ekenin málim etken mınıstr, biraq olardyń sanyn naqtylaǵan joq, dep habarlaıdy RBK agenttigi.

El ekonomıkasyna kelip otyrǵan shyǵyn 3 mıllıard dollardy qurap otyr. 85 polıtsııa ýchaskesi, 13 merııa, 43 bank, 11 zaýyt jáne 66 dúken nemese saýda ortalyqtary zardap shekken nemese qıratylǵan.

Esterińizge sala keteıik, 14 qańtarda Týnıste memlekettik tóńkeris bolyp, el prezıdenti 74 jastaǵy Zın ben Álı Saýd Arabstanyna qashyp ketti. Oǵan deıin prezıdent, elde tótenshe jaǵdaı engizip, úkimetti taratyp, parlamentke jedel merziminen buryn saılaý ótkizý týraly sheshim qabyldap úlgergen bolatyn. Prezıdent elden qashyp ketkennen keıin eldiń joǵary bıligi aldymen premer-mınıstr Mohammed Gannýshıge kóshti, al 15 qańtarda parlament spıkeri Fýad Mbazaa memleket basshysynyń mindetin ýaqytsha atqarýshy retinde ant qabyldady. Gannýshı koalıtsııa úkimet qurý týraly usynysty qabyldap otyr.