Týnıste jaz bastalǵaly 1000 órt oqıǵasy tirkelip, 12 myń gektar jer janyp ketti
ASTANA. KAZINFORM – Týnıste jaz bastalǵaly beri 1000 órt tirkelip, saldarynan shamamen 12,1 myń gektar jer kúlge aınaldy, dep habarlaıdy Anadolu.
Týnıstiń Aýyl sharýashylyǵy, sý resýrstary jáne balyq sharýashylyǵy mınıstrliginiń málimetinshe, aýqymdy órtterdiń saldaryn joıý jumystarynyń qorytyndysy mınıstr Izzeddın Ben Sheıhtiń keńesshisi Heıkel Hashleftiń tóraǵalyǵymen ótken keńeste shyǵaryldy.
Jıynda bıylǵy jaz maýsymynda aýyl sharýashylyǵy alqaptary men orman alqaptarynda bolǵan órtterdiń saldary qorytyndylanyp, olardy sóndirý sharalarynyń tıimdiligi baǵalandy.
Keńeske ishki ister, qorǵanys, qarjy, kólik, qorshaǵan orta, qurylys jáne turǵyn úı-kommýnaldyq sharýashylyǵy mınıstrlikteriniń, Ulttyq azamattyq qorǵanys basqarmasynyń, Ulttyq meteorologııa ınstıtýtynyń, sondaı-aq Aýyl sharýashylyǵy mınıstrliginiń ortalyq jáne óńirlik bólimsheleriniń ókilderi qatysty.
Usynylǵan málimetterge sáıkes, jaz bastalǵaly orman qyzmetteri jalpy sany 1000 órtti sóndirgen. Órtterdiń shamamen 90 paıyzy astyq alqaptarynda, egin jınalǵan egistik jerlerde jáne qurǵaq jaıylymdarda bolǵan. Jalpy janyp ketken aýmaq 12 100 gektardy qurady.
Keńeste órtpen kúresti qıyndatqan negizgi faktorlar retinde aýa temperatýrasynyń joǵary bolýy, jalǵasyp jatqan qurǵaqshylyq, qatty jel jáne keıbir óńirlerdiń kúrdeli jer bederi ataldy.
Heıkel Hashlef orman alqaptary men aýyl sharýashylyǵy óndirisin qorǵaý ulttyq basymdyq ekenin atap ótti. Onyń aıtýynsha, órttiń aldyn alý sharalaryn jalǵastyrý, erte eskertý jáne monıtorıng júıelerin jetildirý, jaýapty mekemeler arasyndaǵy úılestirýdi kúsheıtý, sondaı-aq fermerler men orman alqaptaryn paıdalanatyn azamattar arasynda túsindirý jumystaryn jandandyrý qajet.
Sondaı-aq ol salalyq mekemelerdiń kadrlyq áleýeti men materıaldyq-tehnıkalyq bazasyn nyǵaıtyp, órtti baqylaý jáne keltirilgen shyǵyndy baǵalaý úshin zamanaýı tehnologııalardy keńinen qoldaný jedel áreket etý tıimdiligin arttyratynyn aıtty.
Týnıste jyl saıyn jaz mezgilinde aptap ystyqtyń kúsheıýi, qurǵaqshylyq pen qatty jeldiń saldarynan orman jáne aýyl sharýashylyǵy alqaptarynda kóptegen órt bolady. Ásirese eldiń soltústik-batysyndaǵy ormandy óńirler men astyq ósiriletin aýmaqtar jıi zardap shegedi. Sońǵy jyldary tilsiz jaý myńdaǵan gektar jerdi sharpyǵan. Bılik órt qaýpin azaıtý úshin aldyn alý sharalaryn, erte eskertý júıelerin jáne vedomstvoaralyq ózara is-qımyldy kúsheıtý jumystaryn jalǵastyryp keledi.
Aıta keteıik, DDU orman órti tútinindegi bólshekterdiń qanǵa túsetinin eskertti.
