Týnıste ulttyq birlik úkimeti jasaqtaldy
ASTANA. 28 qańtar. QazAqparat - Týnıstiń Premer-Mınıstri Muhammed Gannýshı 12 mınıstrdi aýystyryp, aýyspaly úkimette aýqymdy kadrlyq ózgertýler jasady.
Ózi jańa kabınettiń basshylyǵynda qaldy, dep habarlaıdy RBK agenttigi.
"Endi úkimettegi jańa mınıstrlerdiń úsheýi ǵana Týnıstiń burynǵy prezıdentiniń «Demokratııalyq konstıtýtsııalyq birlestik» partııasymen baılanysty", - dep habarlaıdy Associated Press. 2011 jyly 17 qańtarda shaqyrylǵan buǵan deıingi mınıstrler kabınetinde atalmysh partııanyń 9 múshesi bolatyn.
Jańa syrtqy saıasat mınıstri bolyp kadrlyq dıplomat Ahmed Ýnaıes taǵaıyndaldy, ol buǵan deıin Týnıstiń syrtqy ister mınıstriniń janynda memlekettik hatshy bolǵan. Al jańa qorǵanys mınıstri bolyp Ábdelkerim Zbıldı, ishki ister mınıstri bolyp Farhat Radjhı taǵaıyndaldy. Úsh mınıstr de eshqandaı partııaǵa kirmeıtin táýelsiz tulǵalar.
Bul Týnıstiń aýyspaly úkimetiniń sońǵy 10 kúnniń ishinde aýysyp otyrǵan ekinshi quramy. Aldaǵy 6 aıdyń ishinde elde parlamenttik saılaý ótýi kerek.
Esterińizge sala keteıik, 14 qańtarda Týnıs prezıdenti elden qashyp ketip, Saýd Arabstanyn panalaǵan bolatyn. Bıliktiń aýysýyna jumyssyzdyq, sybaılas jemqorlyq, qymbatshylyq problemalaryna ashynǵan halyqtyń tolqýlary sebep boldy. 2010 jyldyń jeltoqsan aıynan beri jalǵasqan narazylyq sharalarynda 100-den astam adam qaza tapty. Prezıdent taǵynan taıdyrylǵan soń, bılik premer-mınıstr Muhammed Gannýshı jetekshilik etetin aýyspaly úkimetke aýysty. Biraq osynyń izin ala Týnıste jańa tolqýlar oryn aldy. Adamdar mınıstrler kabınetiniń quramynan eks-prezıdenttiń «Demokratııalyq konstıtýtsııalyq birlestik» partııasymen baılanysty barlyq saıasatkerlerdiń shyǵarylýyn talap etti.
