Týnıste eki poıyz soqtyǵysyp, 30-dan astam adam zardap shekti
KAIR. QazAqparat – Beısenbi kúni Týnıs astanasy mańynda eki poıyzdyń soqtyǵysýy saldarynan kem degende 33 adam zardap shekti. Bul týraly QazAqparat Mosaique FM radıostansasyna silteme jasap habarlaıdy.
Týnıstiń Ulttyq temirjol kompanııasynyń málimetinshe, beısenbide poıyz quramdarynyń biri Megren stansasynda turǵan alys jol júretin jolaýshylar poıyzymen soqtyǵysty.
«Aldyn ala málimet boıynsha, 33 jolaýshy túrli dárejedegi jaraqattar alǵan. Zardap shekkenderdiń barlyǵy alǵashqy medıtsınalyq kómek kórsetilýi úshin dereý aýrýhanalarǵa jetkizildi», - delingen kompanııa habarlamasynda.
Arnaıy qurylǵan komıssııa apat jaǵdaılary men sebepterin, sondaı-aq oǵan kináli tulǵalardy anyqtaý úshin tergeý amaldaryna kiristi.
