Týnıs Prezıdenti áleýmettik shıelenisti tómendetý maqsatynda qoǵammen kelisim jasaýǵa daıyn
ASTANA. 10 aqpan. QazAqparat - Týnıste turaqtylyq pen qaýipsizdikti qalpyna keltirý maqsatynda ulttyq deńgeıde kelissózder bastalady.
Sársenbi kúni keshke ýaqytsha prezıdent Fýad Mebazaa málimdegendeı, bul halyqty «senim bildirýge jáne shydamdy bolýǵa» shaqyra otyryp, «ártúrli sanattaǵy azamattardyń aldynda turǵan barlyq áleýmettik máselelerdi sheshýge múmkindik beretin dıalog bolmaq», dep habarlaıdy ITAR-TASS.
Taqtan qulaǵan Memleket basshysy Zın ál-Abıdına ben Álı qashyp ketken kúnniń ertesine - 15 qańtar kúni qyzmetine kirisken Mebazaa alǵash ret otandastaryna telearna arqyly úndeý jasady. Ol eńbek jaǵdaıyn jaqsartý boıynsha usynylǵan talaptardyń zańdy ekendigimen kelisti, degenmen «halyqqa jaǵdaıdyń barynsha kúrdeli ekenin uǵyný» qajettigin eskertip ótti.
Halyq jalaqyny kóterip, jumyssyzdyq deńgeıin tómendetýdi, sonymen qatar ben Álıdiń avtorıtarlyq rejıminiń «murasyn» jáne onyń Demokratııalyq konstıtýtsııalyq biriktirý partııasyn joıýdy talap etýde.
