Týnıs AQSh elshiligine shabýyl jasaǵandardyń 87-sin ólim jazasyna kesýdi talap etpek

dep habarlaıdy Associated Press.

 Kúdiktilerdiń qorǵaýshylary málimdegendeı, aıyptaýshy jaq kem degende 87 adamnyń  ólim jazasyna kesilýine qol jetkizýdi kózdep otyrǵan kórinedi. Olarǵa ulttyq qaýipsizdikke qaýip tóndirdi degen aıyp taǵylyp otyr, dep jazady Lenta.rý.

 Esterińizge sala keteıik, 14 qyrkúıekte birneshe myńdaǵan demonstranttar AQSh elshiliginiń aldynda antıamerıkandyq qarsylyq sharasyn uıymdastyrǵan bolatyn. Olar polıtsııamen qaqtyǵysqa túsken. Bir bóligi olardyń tosqaýylyn buzyp shyǵyp, dıpmıssııa terrıtorııasyna ótip ketken jáne elshilik ǵımaratyna «Alladan basqa Qudaı joq, Muhammed ­- onyń Elshisi» degen jazýy bar qara jalaýlardy ilip tastaǵan. Tártipsizdik saldarynan 4 sherýshi mert bolyp, ondaǵan adam jaraqattandy.

 Bul narazylyq Islam dini men Muhammed paıǵambardy qaralaıtyn atyshýly «Musylmandardyń kinásizdigi» fılmine qatysty bolǵan. AQSh-ta túsirilgen áýesqoı lentanyń treıleri 2012 jylǵy qyrkúıektiń basynda búkil ǵalamtordy jaýlap ketken edi.

 «Musylmandardyń kinásizdigi» tek Týnıste ǵana emes, Mysyr, Iran, Pákistan, Indonezııa jáne Lıvan sekildi ıslam elderiniń kóbinde osyndaı antıamerıkandyq narazylyq sherýine túrtki boldy. Lıvııada Bengazı qalasyndaǵy AQSh elshiligine jasalǵan shabýyl kezinde dıpmıssııanyń 4 qyzmetkeri, sonyń ishinde amerıkandyq elshi de qaza tapty. Keıbir elderde polıtsııamen qaqtyǵysyp qalǵan sherýge qatysýshylar kóz jumdy.