Tuńǵyshbaı Jamanqulov «Fenıkstiń» aqshasyn uıaly telefonynyń aqysy men óz úıin kúzetýge jumsaǵan
ALMATY. QazAqparat - «Fenıks» kınofılmine bólingen qarjyny rejısser Tuńǵyshbaı Jamanqulov uıaly telefonynyń aqysy men óz úıin kúzetýge jumsaǵan. Bul týraly qylmystyq isti sotta qaraý barysyndaǵy sot otyrysynda «Fenıks» kınofılminiń burynǵy bas dırektory Kerimjan Esbaev málim etti.
Sotqa túsinik bergen kýágerdiń ózi «Fenıks» kınokartınasynyń bas dırektory bolyp formaldy túrde tirkelgenimen, fılmge eshqandaı qatysy bolmaǵanyn áńgimelep berdi.
Kerimjan Esbaev atalǵan jumysqa ózin Tuńǵyshbaı Jamanqulov shaqyryp, tikeleı taǵaıyndaǵanyn aıtty. Atap aıtarlyǵy, onyń aı saıyn alatyn jalaqysy T. Jamanqulovtyń jeke qajettilikterine jumsalyp otyrǵan.
«Aqsha T. Jamanqulovtyń úıin jóndeýge, kommýnaldyq qyzmet aqysyna, uıaly telefony jáne úıiniń kúzet qyzmetiniń aqysyn tóleýge jumsaldy. Bul tólemder tikeleı T. Jamanqulovtyń nusqaýymen jóneltildi. Al shyǵyndardy men óz jýrnalyma jazyp otyrdym, sol jýrnaldy óz erkimmen tergeý organdaryna berdim. Sondaı-aq, aqsha T. Jamanqulovtyń ulynyń Máskeýge baryp-qaıtqan jolyna jumsaldy», - dep áńgimeledi kýáger.
Sot otyrysynda Kerimjan Esbaev Tuńǵyshbaı Jamanqulovtyń shyǵyndaryn rastaıtyn qujattardy sotqa usyndy.
Buǵan qosa, kýáger Tuńǵyshbaı Jamanqulovqa arnalǵan qarjynyń qalaı qolma-qol aqshaǵa aınaldyrylǵanyn egjeı-tegjeıli áńgimeledi. «Jamanqulov «Fenıkstiń» fılminiń prodıýseri Natalıa ıÝdınaǵa 6 mln. teńgeni qolma-qol aqshaǵa aınaldyrýǵa nusqaý berdi. Bul áńgimeni kartınanyń rejısseri Talǵat Jánibekov, redaktory Ǵızat Sultanov jáne esepshi Nazgúl Júnisova óz qulaǵymen estidi»,- dedi sottaǵy túsiniginde Kerimjan Esbaev.
Kýáger sondaı-aq, qylmystyq istiń materıldary Sybaılas jemqorlyqqa qarsy is-qımyl qyzmetine berilgen soń Tuńǵyshbaı Jamanqulov fılmdi túsirýshiler tobyn jınap alyp, eshkimniń ózine qarsy quzyrly organdarǵa túsinik bermeýin qadap tapsyrǵanyn ashyq aıtty.
«21-inshi nemese 23-inshi qańtarda Jamanqulov maǵan qońyraý shalyp, óz keńsesine shaqyrdy. Keńsege kelgenimde meni buryn quzyrly organdarǵa bergen jaýaptarymnan bas tartýdy ótindi, al eger bas tartpaǵan jaǵdaıda meni qylmystyq jaýapkershilikke tartý úshin qolynan kelgen nárseniń barlyǵyn jasaıtynyn atyp, qorqytty», - dep sózin aıaqtady kýáger.
Eske sala keteıik, Sybaılas jemqorlyqqa qarsy is-qımyl jónindegi Ulttyq bıýro «Fenıks» kınofılmin túsirýge bólingen bıýdjet qarajatynyń urlanǵany týraly faktilerdi anyqtady. Tergeýdiń nusqasy boıynsha, fılmdi túsirýge bólingen 79 mln. teńgeniń 69 mln-yn kartınanyń prodıýseri Tuńǵyshbaı Jamanqulov jymqyrǵan. Osy maqsatqa ol ózi quryltaıshy bolyp tabylatyn «T.K. TURAN UNIVERSAL BUSINESS» fırmasyn paıdalanǵan.
Aıta ketelik, tergeý barysynda Tuńǵyshbaı Jamanqulov óziniń qorǵaýshysynyń kózinshe bıýdjet qarajatyn urlaǵanyn tolyq moıyndady. Sondaı-aq, jymqyrylǵan aqshany qolma-qol aqshaǵa aınaldyryp, óziniń jeke qajettilikterin qanaǵattandyrýǵa jumsalǵanyn aıtty. Tergeý nátıjesinde belgili bolǵany, «Fenıks» kınofılminiń alǵashqy jáne daıyndyq kezeńderiniń óndirisine dep «T.K. Turan Universal Business» JShS-ine 79 mln. teńge aýdarady. Sonyń ishindegi 69 mln. teńgesin joǵaryda aty atalǵan kompanııa arqyly kınokartınanyń bas prodıýseri Tuńǵyshbaı Jamanqulov urlaǵan. Atalǵan kompanııanyń quryltaıshysy da - T. Jamanqulov. Aqsha qosalqy merdigerlik uıymdar arqyly qolma-qol aqshaǵa aınaldyrylyp, keıinirek T. Jamanqulovqa jetkizilgen.
