Tuńǵysh ret ótkizilgen «Uly dala» respýblıkalyq baıqaýy óz máresine jetti
Saltanatty is-sharaǵa partııa Tóraǵasynyń Birinshi orynbasary Máýlen Áshimbaev jáne belgili aqyn-jazýshylar men zııaly qaýym ókilderi qatysty.
Ótken jyldyń sońynda Elbasymyz «Uly dalanyń jeti qyry» atty maqalasyn jarııalap, «Rýhanı jańǵyrý» baǵdarlamasyna tyń serpin bergeni belgili. Soǵan baılanysty elimiz boıynsha aýqymdy jumystar qolǵa alynyp, naqty jobalar júzege asyryla bastady. «Uly dala» shyǵarmashylyq baıqaýy da sondaı ıgi isterdiń biri.
Barsha jeńimpazdar men júldegerlerdi quttyqtaǵan Máýlen Áshimbaev aldymen Memleket basshysynyń «Rýhanı jańǵyrý» baǵdarlamasynyń mańyzyna toqtalyp ótti. - Elbasy «:Bolashaqqa baǵdar: rýhanı jańǵyrý» jáne «Uly dalanyń jeti qyry» atty baǵdarlamalyq maqalalary arqyly elimizdiń ıdeologııa salasyndaǵy jańa kezeńdi bastap berdi. Óıtkeni bul maqalalarda ulttyq kodty saqtap, tarıhı sanamyzdy qalyptastyrýǵa, sol arqyly rýhanı ómirimiz ben ulttyq sanamyzdy jańǵyrtýǵa baǵyttalǵan naqty máseleler kóterilgen. Búgingideı aýmaly-tókpeli zamanda ult bolyp saqtalyp, táýelsizdigimizdi máńgilik etýdiń qanshalyqty mańyzdy ekeni belgili. Sol jolda osy maqalalarda aıtylǵan basymdyqtardyń bereri mol. Sondyqtan Elbasy kótergen qundylyqtar men ıdeıalardy dáripteý, elimizdiń rýhanı jańǵyrýyna úles qosý - bizdiń basty mindetimiz, - dedi «Nur Otan» partııasy Tóraǵasynyń Birinshi orynbasary. Sonymen qatar ol osy jumystarda qolyna qalam ustaǵan jandardyń róli erekshe ekenine nazar aýdardy. - Rýhanı jańǵyrý baǵdarlamasy aıasynda jastarmen júıeli jumys júrgizýimiz kerek. Ol úshin jas býynǵa qyzyqty, olarǵa durys qundylyqtardy dáripteıtin shyǵarmalar qajet. Sondyqtan osyndaı baıqaý jarııalap, oǵan jas qalamgerlerdi qatystyrýdy uıǵardyq. Sol arqyly biz jas aqyn-jazýshylarymyzdyń shyǵarmalarynyń nasıhattalýyna, olardyń ádebıet áleminde ózindik orny bar kórnekti qalamger bolyp qalyptasýyna septigimizdi tıgizýdi maqsat etip otyrmyz, - dedi Máýlen Áshimbaev.
Odan bólek, partııa Tóraǵasynyń Birinshi orynbasary jas aqyn-jazýshylardy qoldaýǵa baǵyttalǵan osyndaı jobalardyń aldaǵy ýaqytta da óz jalǵasyn tabatynyn jetkizdi. - Partııamyz tek osy baıqaýmen shektelip qalmaıdy. Aldaǵy ýaqytta da jas qalamgerlerdi yntalandyryp, qoldaý maqsatynda birqatar jobalardy júzege asyramyz. Sondyqtan búgin júldegerler qataryna ilige almaı qalǵan jastardy sol jobalarǵa belsene qatysýǵa shaqyramyn. Jalpy osy baıqaýǵa qatysqan jumystardyń barlyǵy aldaǵy ýaqytta halyq arasynda keńinen tarap, oqyrmandardyń oń baǵasyn alady dep senemin, - dedi Máýlen Áshimbaev.
Partııa bul jobany Qazaqstan Jazýshylar odaǵymen birlesip uıymdastyryp otyr. Tarqatyp aıtar bolsaq, ótken jyldyń qazan aıynda «Nur Otan» partııasy otandyq aqyn-jazýshylarǵa júıeli qoldaý kórsetý úshin Jazýshylar odaǵymen ózara yntymaqtastyq týraly memorandýmǵa qoı qoıǵan edi. Búgingi baıqaý sol ıgilikti istiń naqty jemisi. Sondaı-aq bul qadamnyń «Jastar jyly» aıasynda jas qalamgerlerimizdiń shyǵarmashylyqpen aınalysýyna kórsetilgen úlken qoldaý ekeni de sózsiz. Jalpy baıqaýǵa 18 ben 40 jas aralyǵyndaǵy qalamgerler qatysty. Shyǵarmalardy qabyldaý merziminiń qysqalyǵyna qaramastan 400-den astam eńbek kelip túsken. Nátıjesinde bes birdeı atalym boıynsha jeńimpazdar men júldegerler anyqtaldy.
Atap aıtqanda, «Proza» atalymynda «Qudyq basyndaǵy ekeý» shyǵarmasymen qatysqan Maqsat Málikov úzdik dep tanyldy. Ekinshi oryn «Medal» atty týyndynyń avtory Qanat Tileýhanǵa buıyrdy. Al úzdik úshtikti «Kazahstanets» shyǵarmasymen Tatıana Kretova túıindedi. Sol sııaqty «Poezııa» atalymynda Janat Jańqashuly - 1-oryn, Nurgúl Maýlına - 2-oryn, Batyrhan Sársenhan 3-oryn aldy. Úsh aqynnyń da baıqaýǵa óleńder toptamasyn usynǵanyn atap ótken jón. «Dramatýrgııa, kórkem fılmder men teleserıaldar stsenarııi» atalymynda taıaýda ǵana «Qazaqstan» ulttyq telearnasynan kórsetilip, kóptiń kózaıymyna aınalǵan «Keıki mergen» teleserıalynyń stsenarııin jazǵan Serjan Zákeruly top jardy. Ekinshi, úshinshi oryndardy tıisinshe «Aısulý» fılminiń stsenarııimen Aıdos Dildebaı jáne «Ábdiǵappar» dramalyq týyndysynyń avtory Abylaı Maýdanov ıemdendi.
«Balalarǵa arnalǵan shyǵarmalar» atalymynda «Uly dalanyń jeti qyry» óleńder toptamasynyń avtory Baýyrjan Qaraǵyzuly bas júldeni aldy. «Ulttyq mýzeıge ekskýrsııa» shyǵarmasynyń avtory Asylan Tilegen ekinshi orynǵa taban tirese, baıqaýǵa «Jylqy degen janýar» óleńder toptamasymen qatysqan Serikbol Hasan úshinshi orynnan kórindi.
«Pýblıtsıstıka» atalymynda 1-oryn - Maqpal Jumashevaǵa (shyǵarmasy - «Kók bóri totemi»), 2-oryn - Qanat Ábilqaıyrǵa (shyǵarmasy - «Muzdaýan Muzdybaı»), al 3-oryn Gúlbaný Tebegenovaǵa (shyǵarmasy - «Rýhanı jańǵyrý - úshtildilik») buıyrdy.
Barlyq jeńimpazdar men júldegerlerge qomaqty qarjylaı syıaqylar taǵaıyndaldy Soǵan oraı 1-oryn ıegerlerine - 1,5 mln, 2-oryn ıegerlerine - 750 myń, al 3-oryn alǵan qalamgerlerge 500 myń teńgeden berildi.
Aıta keteıik, baıqaýdyń qazylar alqasynyń quramynda Tólen Ábdik, Aldan Smaıyl, Nesipbek Aıtuly, Ulyqbek Esdáýlet, Nurtóre Júsip, Júsipbek Qorǵasbek, Kópen Ámirbek jáne Álııa Bópejanova sııaqty belgili qalamgerler boldy.
Taǵy bir atap óter jaıt, «Nur Otan» partııasy Jazýshylar odaǵymen aradaǵy memorandým aıasynda basqa da birqatar jobalardy júzege asyrýda. Máselen «Astana» telearnasy arqyly qalyń kórermenge jol tartqan aqyn-jazýshylarymyzdyń ónegeli ómirinen syr shertetin telejoba, partııalyq joba aıasynda jańǵyrtylǵan kitaphanalardaǵy kovorkıng-ortalyqtarda qalamgerlermen kezdesý keshteri jáne kórermenderge tárbıelik sıpattaǵy kórkem dúnıeler usynatyn arnaıy YouTube-kanal ashý jobalary osy baǵyttaǵy jumystardyń jemisi.
