Tuńǵysh ret fýtfrıstaıldan Qazaqstan chempıonaty ótedi
ASTANA. 21 qyrkúıek. QazAqparat -Fýtbol frıstaıly atty jobasy elimizde byltyrdan bastap iske asa bastady. Sol sátten osy kúnge deıin eki jarys ótkizildi.
2011 jyly tusaýkeser saıysta almatylyq Oljas Oqasov altynnan alqa taqty. Bıyl Ońtústik astana birinshiliginde báıgeni Almaty oblysynyń ókili Aıdar Seıitjanov ıelendi.
«Alaman» sport agenttiginiń málimetinshe, 23 qyrkúıekte kópten kútken, tuńǵysh ret fýtfrıstaıldan Qazaqstan chempıonaty ótedi. El birinshiligine 20-dan astam saıysker altynǵa talaspaqshy. Búkil sheberligin kórsetýge Astana, Almaty, Qyzylorda, Pavlodar, Shymkent jáne basqa qalalardyń ókilderi keledi.
Álemde bul sport óneri áldeqaıda alǵa basqan, úlken jarystar ótkizilip júr. Jýyrda ǵana Chehııada úshinshi álem chempıonaty boldy. Fýtfrıstaıl jastar arasynda óte tanymal, kóbisi buny óziniń kásibine aınaldyrǵan. Alǵashqy El birinshiliginiń maqsaty men úmiti, bolashaqtaǵy álem saıysyna qazaqtyń ulyn attandyrý. Ol armanymyz oryndalýyna alys emes, 2013 jyly álem chempıonaty irikteý oıyndary Astana nemese Almaty qalalarynda ótkizilýi josparda.
Jarys arnaıy fýtfrıstaılǵa arnalǵan doptarmen ótkiziledi. Onyń ishinde, osy El birinshiligine arnaıy DJI EF atty dop ákelingen. DJI EF - fýtfrıstaıldan álem chempıony Djon Farnvor jasap shyǵarǵan doby. Jáne de jarysqa qatysýshylar áıgili MONTA-men ónerin kórsete alady.
