Tuńǵysh ret FIDE komıssııasyna Qazaqstan ókilderi engizildi
ASTANA. QazAqparat - Halyqaralyq shahmat federatsııasy (FIDE) komıssııasynyń quramyna tuńǵysh ret Qazaqstannyń alty ókili endi. Atalǵan tizim búkilálemdik shahmat federatsııasynyń úsh jyl saıyn ótetin prezıdenttik keńesinde bekitiledi, dep habarlaıdy QazAqparat Olympic.kz saıtyna silteme jasap.
Dástúr boıynsha, komıssııa músheligine shahmattaǵy tanymal qaıratkerler, óz elinde shahmatty damytýǵa úles qosqan tulǵalar qabyldanady.
Qazaqstan shahmat federatsııasynyń vıtse-prezıdenti Berik Balǵabaev FIDE prezıdentiniń keńesshisi bolyp saılandy.
Jandos Ábishev is-sharalar jónindegi komıssııa múshesi atansa, áleýmettik suraqtar boıynsha komıssııa múshesi bolyp QShF Atqarýshy dırektory Irına Grışenko tańdaldy. Halyqaralyq sport sheberi ári grossmeıster Evgenıı Vladımırov FIDE-niń bilim berý komıssııasy quramyna endi. Álem jáne Azııa chempıony, grossmeıster Dármen Sádýaqasov ǵalamdyq strategııalar jónindegi komıssııadan oryn aldy. Álem chempıony, grossmeıster Dınara Sádýaqasova erejeler jónindegi komıssııaǵa, al QR ulttyq qurama múshesi Gúlmıra Dáýletova jerebe tartý jónindegi komıssııaǵa múshe boldy.
«Bıyldan bastap shahmat áleminde Qazaqstanǵa úlken jol ashylady. Múmkindikter kóbeıedi. Shahmatty elimizde damytýdan bólek, FIDE-niń sheshim qabyldaýyna áser etetin federatsııalardyń biri bolyp sanalamyz. Bul úlken qadam Qazaqstannyń álemdik shahmatta alar orny erekshe ekenin kórsetedi», - deıdi vıtse-prezıdent Jandos Ábishev.
FIDE komıssııasynyń quramyna álemniń 130 memleketinen 224 adam endi. Qazaqstan óz ókilderiniń sany boıynsha Reseı men AQSh-tan keıingi úshinshi orynda tur. Buǵan deıin FIDE komıssııasynyń quramynda birde-bir qazaqstandyq bolmaǵan.
