Tuńǵysh ret áskerı mýzykanttar Astana kóshelerinde kontsert ótkizedi

ASTANA. QazAqparat - 30 sáýir kúni Astanada Otan qorǵaýshy kúni men Uly Otan soǵysyndaǵy Jeńistiń 70 jyldyq mereıtoıy qarsańynda áskerı mýzykanttardyń qatysýymen «Jeńisti jyrlaımyn» atty erekshe aktsııa ótedi. Bul týraly QR Qorǵanys mınıstrliginiń baspasóz qyzmetinen habarlady.

Eki qabatty ekskýrsııalyq avtobýspen QR Qorǵanys mınıstrligi Ortalyq ansambliniń ártisteri elordanyń kórnekti kóshelerin aralaı júrip kontsert qoıady. Kontserttik avtobýs Aqjol kóshesi - Abylaı han dańǵyly - Qabanbaı batyr dańǵyly («Azııa park» SOO) - «Báıterek» monýmenti - Aqjol kóshesi baǵyttarynda júredi. Osy oraıda jol boıy olar soǵys jyldaryndaǵy tanymal ánderdi shyrqaıdy, sondaı-aq óz baǵyttary boıynsha toqtaǵan ár pýnktte kishigirim áskerı-patrıottyq kontsert ótkizip, elorda turǵyndary men qonaqtaryna QR Qarýly Kúshteriniń belgisi basylǵan estelik syılyqtar taratady. Atalǵan aktsııa astanalyqtar men barlyq qazaqstandyqtarǵa sanaýly kún qalǵan mereıtoıdy taǵy bir márte eske salyp, jastardyń boıynda otansúıgishtik rýhty kóterýge yqpal etedi. Qazirgi ýaqytta elimizdiń barlyq óńirinde ótkizilip otyrǵan sharalar UOS ardagerlerine kórsetilgen qurmet bolyp tabylady.