Tuńǵysh Prezıdenttiń tarıhı eńbek sińirgenin de umytpaıyq – Qasym-Jomart Toqaev

NUR-SULTAN. QazAqparat – El Prezıdenti Qasym-Jomart Toqaev Nur Otan partııasynyń kezekten tys XXI sezinde Tuńǵysh Prezıdent Nursultan Nazarbaevtyń tarıhı róli týraly aıtty, dep habarlaıdy QazAqparat.

«Tuńǵysh Prezıdenttiń tarıhı eńbek sińirgenin umytpaıyq. Túptiń túbinde ádil jáne shynshyl bolýymyz kerek. Ótkenin qaralaǵan halyqtyń bolashaǵy joq. Ótken zamandy joqqa shyǵaratyn, óz basshylaryna shabýyl jasaıtyn halyqtyń bolashaǵy ekitalaı ári bulyńǵyr. Kemshilikter Amerıka prezıdentteri men Qytaı basshylarynda da, tipti qazir barlyǵy maqtap eske alatyn sıngapýrlyq kóshbasshy Lı Kýan ıÝda da bolǵan», - dedi Prezıdent Qasym-Jomart Toqaev.

Memleket basshysy Sıngapýrdyń da, AQSh-tyń da, Qytaıdyń da halyqtary men bıleýshi toptary óz basshylarynyń qadir-qasıetin kemshilikterden joǵary qoıyp, qos uǵymdy ajyrata bilgenin aıtty. Óıtkeni, jumys istemeıtin adamnyń ǵana qatelespeıtini burynnan belgili.

«Tuńǵysh Prezıdenttiń tarıhı eńbegine qurmet kórseteıik, onyń sózsiz jetistikteri men qadir-qasıetterin birinshi orynǵa qoıaıyq, al bolýy múmkin jańylystardy elimizdiń bolashaq basshylaryna ǵıbrat etip qaldyraıyq», - dedi Q. Toqaev.

Aıta keteıik, Nur-Sultanda Nur Otan partııasynyń kezekten tys XXI sezi jabyq rejımde ótip jatyr. Bekitilgen kún tártibine sáıkes, onda – partııanyń Tóraǵasyn saılaý týraly, jarǵyǵa ózgerister men tolyqtyrýlar engizý týraly jáne saıası keńes quramyna ózgerister engizý týraly úsh másele qaralady.