Tuńǵysh Prezıdenttiń «Órken» grantyna 341 oqýshy ıe boldy
ASTANA. 27 qańtar. QazAqparat /Jasulan Joldybaev/ - Keshe mınıstr Baqytjan Jumaǵulovtyń tóraǵalyǵymen QR Bilim jáne ǵylym mınıstrliginde QR Tuńǵysh Prezıdenti - Elbasynyń «Órken» bilim berý grantyn taǵaıyndaý jónindegi respýblıkalyq komıssııa otyrysy ótkizildi.
Respýblıkalyq komıssııa Oral qalasyndaǵy fızıka-matematıkalyq baǵyttaǵy Nazarbaev Zııatkerlik mektebiniń 7-9 synyptarynda bilim alatyn oqýshylardy irikteý konkýrsynyń nátıjelerin qarady.
Oral qalasyndaǵy fızıka-matematıkalyq baǵyttaǵy Nazarbaev Zııatkerlik mektebine qujat qabyldaý men konkýrstyq irikteý 2011 jylǵy 12 qyrkúıek pen 27 qazan aralyǵynda júrgizildi. Oqýshylardy qabyldaý qazaq jáne orys tilderinde bilim beretin 7, 8, 9 synyptarda júzege asyryldy. Tuńǵysh Prezıdenttiń «Órken» grantyn taǵaıyndaý konkýrsynda 336 úmitker tıisti shekteýli baldy aldy, onyń ishinde 100-den astamy - aýyl mektepteriniń oqýshylary.
Komıssııa músheleriniń qaraýyna 341 úmitkerdiń materıaldary usynyldy, olardyń 336-sy Batys-Qazaqstan oblysynyń 7-9 synyptarynyń oqýshylary, qalǵan 5-eýi Kókshetaý, Taldyqorǵan, Óskemen qalalaryndaǵy Nazarbaev Zııatkerlik mektepteriniń rezervtik tizimindegi úmitkerler.
Respýblıkalyq komıssııanyń sheshimi boıynsha 341 oqýshy bilim berý grantynyń ıegerleri boldy.
Búgingi tańda Oral qalasyndaǵy Nazarbaev Zııatkerlik mektebiniń qurylys jumystary men qural-jabdyqtardy ornatýdyń aıaqtalý kezeńi júrgizilip jatyr. Oqý memlekettik komıssııanyń obektini qabyldaýynan keıin bastalady. Oqýdyń bastalýy týraly grant ıeleri qosymsha aqparattandyrylady.
