Tuńǵysh Prezıdenttiń ókilettigin 2020 jylǵa deıin uzartý týraly referendýmdy ótkizý Ata zańymyzdyń rýhyna saı keledi - zańgerler qoǵamdyq birlestigi

QazAqparat osynaý májilistiń qorytyndysy boıynsha zańgerler qabyldaǵan úndeýdiń mátinin nazarlaryńyzǵa usynady.

«Zańgerler ádiletti saılaý úshin» Respýblıkalyq qoǵamdyq birlestiginiń Úndeýi

Qurmetti qazaqstandyqtar, qadirli zańger-áriptester!

Bizder - «Zańgerler ádiletti saılaý úshin» Respýblıkalyq qoǵamdyq birlestiginiń ókilderi, mıllıondaǵan otandastarymyz - Qazaqstan Respýblıkasynyń azamattary sekildi, Qazaqstan Respýblıkasynyń Tuńǵysh Prezıdenti - Elbasy Nursultan Ábishuly Nazarbaevtyń ókilettigin 2020 jylǵa deıin uzartý jónindegi másele boıynsha referendým ótkizý týraly bastamany qyzý qoldaımyz.

Qazaqstannyń demokratııalyq, zaıyrly, quqyqtyq jáne áleýmettik memleket retinde odan ári ornyǵýy jaǵdaıynda, elimiz úshin áleýmettik ilgerleýge qaratylǵan strategııalyq baǵyttyń qalypty ári dáıektilikpen iske asyrylǵany, ishki jáne syrtqy saıası basymdyqtardyń ultaralyq tatýlyq, ózara senim, dástúrdi qurmetteý, ashyqtyq jáne tózimdilik negizinde júzege asyrylǵany qajet ekenine biz senimdimiz. Jańa eýro-azııalyq qaýipsizdikti qurý, postkeńestik keńistiktegi ıntegratsııany ásirese taıaýdaǵy onjyldyqta jalǵastyrý jáne tereńdetý halyqtyń erik-jigerine negizdelgen berik sabaqtastyqqa súıenýge tıis.

Prezıdent N.Á. Nazarbaevtyń konstıtýtsıolızm ıdeıalaryna den qoıǵandyǵy jáne onyń san qyrly qaıratkerlik qyzmeti arqasynda Azamat pen Memleket arasynda barǵan saıyn senimniń artyp, ózara qarym-qatynas qalyptasqanyn; adamdardyń sana-sezimi men turmys-tirshiligine konstıtýtsııalyq qundylyqtar sińgenin; halyqtyń quqyq mádenıetiniń jáne onyń bılikke degen seniminiń deńgeıi óskenin, quqyq qorǵaý organdary men sottardyń, búkil quqyq qorǵaý mehanızminiń kásibıligi jáne jumys tıimdiligi artqanyn biz kórip otyrmyz.

Memleket basshysy bekitken 2010-2020 jyldarǵa deıingi kezeńge arnalǵan Quqyqtyq saıasat tujyrymdamasynyń iske asyrylýy barysynda adamnyń jáne azamattyń quqyqtary men bostandyqtaryna beriletin kepildik, kásipkerlerdiń qorǵalý deńgeıi arta túsedi; zańnamanyń jańa salalary men baǵyttary paıda bolady; bizdiń quqyǵymyz zamanaýı, jedel ári praktıkanyń qajeti men adamdardyń muqtajyna yńǵaılastyrylǵan bolady.

Quqyqty qoǵamnyń shyn mánindegi jasampaz kúshine aınaldyrý úshin osynsha qajyr-qaırat jumsap júrgen Elbasyn biz qazirgi memleketter mysalynan taba almaımyz. Zańger-ǵalymdar, quqyq pániniń oqytýshylary, jeke jáne jarııa quqyq sektoryndaǵy, qoǵamdyq birlestikterdegi zańgerler, advokattar jáne notarıýsar Respýblıka Prezıdentiniń jan-jaqty qoldaýyn sezinedi, barshamyzdyń jáne ár birimizdiń múddemizge jaýap beretin, elimizdiń odan ári serpindi damýynyń quqyqtyq vektoryn qamtamasyz etýge qabiletti tulǵalar retinde olar ózderiniń bıik ári jaýapty mıssııasyn uǵynady.

«Zańgerler ádiletti saılaý úshin» Respýblıkalyq qoǵamdyq birlestigi Qazaqstan Respýblıkasynyń Tuńǵysh Prezıdenti - Elbasy N.Á. Nazarbaevtyń ókilettigin 2020 jylǵa deıin uzartý týraly respýblıkalyq referendým ótkizý úshin, qoldanystaǵy 1995 jylǵy Konstıtýtsııanyń, «Respýblıkalyq referendým týraly», «Qazaqstan Respýblıkasyndaǵy saılaý týraly» konstıtýtsııalyq zańdardyń, ózge de konstıtýtsııalyq jáne jaı zańdardyń ıdeıalary men erejelerine, sondaı-aq memlekettik qurylystyń qoldaǵy sheteldik tájirıbesine negizdelgen qajetti quqyqtyq sharttardyń bári bar dep senim bildiredi.

Memlekettik bıliktiń birden-bir bastaýy, osy bılikti óziniń ókilderi arqyly ǵana emes, Konstıtýtsııanyń 3-babynyń 2-tarmaǵyna sáıkes tikeleı respýblıkalyq referendým arqyly da júzege asyratyn Qazaqstannyń egemen halqy bul máseleniń búkilhalyqtyq daýys berýge qoıylýyna bastama jasaýǵa jáne Qazaqstannyń memlekettik táýelsizdiginiń jıyrma jyldyǵynda bul másele boıynsha tarıhı ádil jáne meıilinshe quqyqtyq sheshim qabyldaýǵa ejelden quqyly.

Biz barlyq qazaqstandyqtardy jáne birinshi kezekte, zańger áriptesterimizdi respýblıkalyq referendým ótkizý týraly ıdeıany jan-jaqty qoldaýǵa, oǵan bastama jasaýshylarǵa barynsha kómektesýge, memlekettiń otandyq, sheteldik jáne halyqaralyq úkimettik emes uıymdardyń ókilderimen yntymaqtasa jumys isteýge úndeımiz.

Qazaqstan zańgerleri - referendýmdy qoldaıdy, ony ótkizý Halyqtyń erik-jigerine, el Konstıtýtsııasynyń atyna da, zatyna da sáıkes keledi.