Tuńǵysh Prezıdentke «Halyq qaharmany» ataǵyn berý tarıhı sheshim - senator J. Erǵalıev
ASTANA. 1 jeltoqsan. QazAqparat /Qanat Mámetqazyuly/ - Tuńǵysh Prezıdentke «Halyq qaharmany» ataǵyn berý tarıhı sheshim.
Búgin QR Parlamenti Senatynyń jalpy otyrysynda QR Tuńǵysh Prezıdenti-Elbasy N. Nazarbaevqa «Halyq qaharmany» ataǵyn berýdi qamtamasyz etetin zańdy talqylaý barysynda óz pikirin bildirgen senator Jabal Erǵalıev osylaı málimdedi.
«Zamana men dáýirdiń qıly da alasapyrandy «tar jol taıǵaq keshýleriniń» aýmaly-tókpeli kezeńderinen týǵan elin aman alyp ótý Elbasyn tolǵandyryp keldi. Áli de sol jaıt Prezıdentti tolǵandyrady. Qaı bir qatal da qaharly tajal ǵasyrlardyń taýqymetin, qasiretin de, zardaby men zalalyn da kóp tartqan týǵan halqyn 21 ǵasyrdyń biz ómir súrip otyrǵan jańa dáýirdiń jaqsylyqtaryna ilestirip jibersem degen arman múddesi boldy, Elbasynda. Biz osydan 20 jyl buryn álemge táýelsiz el bolǵanymyzdy batyl jarııalaǵan soń, batyl qadamdardy jasaýymyz kerek edi. Sony jasaǵan bir ǵana adam - QR Tuńǵysh Prezıdenti N. Nazarbaev», - dedi senator Jabal Erǵalıev.
Onyń aıtýynsha, Tuńǵysh Prezıdent álemniń jetekshi saıasatkerlerimen teńdeı sóılese alatyn ári Qazaqstan múddesin eń aldyńǵy orynǵa shyǵara biletin erekshe tulǵa. Prezıdent elimizdi asa qysqa kezeńde álemge tanyta bildi. «Qazaq eli men onyń Kóshbasshysy N. Nazarbaevtyń álem aldyndaǵy abyroıynyń joǵary, bedeliniń asqaq, sóziniń ótimdi, pikiriniń paıymdy qasıetin álem túgel tanyp, bir ǵana Qazaq memelketiniń aldyndaǵy ǵana emes, adamzat órkenıetiniń aldyndaǵy órligin álem moıyndap otyr. Biz búgin Elbasynyń mártebesine arnalǵan zańǵa ózgerister engize otyryp, QR Tuńǵysh Prezıdentine «Halyq qaharmany» ataǵyn berý týraly sheshim qabyldaý arqyly barlyq qazaqstandyqtardyń erik-jigerin, qalyń eldiń de tilegin oryndaǵan bolar edik. Bizdiń bul sheshimimiz tarıhı sheshim», - dedi J. Erǵalıev.
