Tuńǵysh Prezıdent murajaıynda japon qýyrshaqtarynyń kórmesi ashylady
ASTANA. QazAqparat - 21 mamyr kúni saǵat 17.00-de Tuńǵysh Prezıdent mýzeıinde Qazaqstandaǵy Japonııa elshiligimen «Mádenıet arqyly únqatysý» halyqaralyq jobasy aıasynda birlese uıymdastyrylǵan «Japon qýyrshaqtary» kórmesiniń ashylý rásimi ótedi.
Bul týraly QR Tuńǵysh Prezıdenti murajaıynyń baspasóz qyzmetinen habarlaıdy.
Aıta keteıik, qýyrshaq jasaý óneri Dzemon kezeńinen bastaý alatyn Japonııada qýyrshaqtar merekelik mádenıettiń ajyramas bóligi bolyp sanalady. Árbir provıntsııanyń ózine tán ereksheligi boıynsha qýyrshaqtar biregeı tehnologııalarmen ázirlendi. 1936 jyly qýyrshaq jasaý ónerine resmı mártebe berildi. Al 1955 jyldan bastap belgili sheberler «Ulttyq jandy qazyna» qurmetti ataǵyn ıelene bastady. Japon qýyrshaqtary óziniń ár alýandylyǵymen, biregeı oryndalý ádisimen erekshelenedi jáne san ǵasyrlar boıy Japonııanyń dástúrli kúntizbelik merekelerinde laıyqty oryn alǵan.
Jyl saıyn Japonııada 3 naýryz kúni Hına matsýrı merekesi - Qýyrshaqtar merekesi atap ótiledi. Osy kúni qyz balalary bar otbasylarda erekshe «hına nınge» kórmesi uıymdastyrylyp, qýyrshaqtardy alqyzyl matamen jabylǵan 3, 5 nemese 7 satydan turatyn arnaıy tuǵyrǵa ornalastyrady. Eń joǵary satyda altyndalǵan jınalmaly kermede barshyn men jibekten tigilgen saltanatty kıimdegi patsha men patshaıymnyń qýyrshaqtar juby ornalasady. Tómengi satylarda saraı mańyndaǵy bıkeshter, ánshiler, mınıstrler men sheneýnikter, oqqaǵarlar men qyzmetshiler qýyrshaqtary ornalasady. Eń tómengi satyǵa saraı turmysynyń buıymdary (mınıatıýralyq jıhaz, qobdıshalar, taǵamdar) qoıylady. Sóıtip árbir otbasy óziniń hına qýyrshaqtarynyń jınaǵyn qoıyp, kishkentaı qyzdary baqytty bolsyn dep tileıdi.
Al besinshi mamyr kúni toılanatyn Kodomo-no hı - Balalar kúni merekesi de qýyrshaqtarsyz ótpeıdi. Onyń qarsańynda japondyq otbasylar úıleriniń aldyna koı noborı - tuqy pishindegi túrli-tústi jalaýlardy ornatady. Jalaýlardyń sany úıdegi ul balalardyń sanyna baılanysty. Sýdyń ekpindi aǵysyna qarsy júze biletin qabileti úshin Japonııada tuqy batyrlyq pen tózimdiliktiń nyshany dep tanylǵan. Jasyl shuǵamen jabylǵan arnaıy sórege gogatsý nınge - saýyt-saımandaǵy samýraılardy beıneleıtin qýyrshaqtar qoıylady. Bul kúni ata-analary uldarynyń deni saý jáne myqty bolyp ósýin tilep, duǵa oqıdy.
30 mamyrǵa deıin jalǵasatyn «Japon qýyrshaqtary» kórmesiniń jádigerleri japondyq merekelik mádenıettiń tańǵajaıyp ertegilik álemine jol ashady.
