Tuńǵysh Prezıdent murajaıynda Renat Elýbaevtyń jeke kórmesi ashylmaq
ASTANA. QazAqparat - 23 sáýir kúni saǵat 17.00-de Qazaqstan Respýblıkasy Tuńǵysh Prezıdentiniń mýzeıinde sýretshi, halyqaralyq «Shabyt» shyǵarmashyl jastar festıvaliniń laýreaty Renat Elýbaevtyń «Kóńil sýreti» atty jeke kórmesiniń ashylý rásimi ótedi.
Kórme mýzeıdiń shyǵarmashyl jastardy qoldaýǵa arnalǵan «Úkili úmit» atty jobasynyń aıasynda uıymdastyrylýda, dep habarlaıdy Qazaqstan Respýblıkasy Tuńǵysh Prezıdenti murajaıynyń baspasóz qyzmetinen.
Renat Elýbaev 1982 jyldyń 18 qyrkúıeginde Arqalyq qalasynda dúnıege kelgen. Jastaıynan sýret salýmen aınalysqan ol Torǵaıda ótkizilgen kórkemónerpazdar baıqaýynda ekinshi oryndy ıelenip, úshinshi synypta oqyp júrgeninde-aq alǵashqy jetistigine qol jetkizedi. 1999 jyly Y.Altynsarın atyndaǵy Arqalyq memlekettik pedagogıkalyq ınstıtýtyna «Beıneleý óneri jáne syzý» mamandyǵy boıynsha oqýǵa túsedi. 2002 jyly Qostanaı qalasynda ótken oblystyq kórkemónerpazdar baıqaýynda birinshi oryndy ıelendi.
2003 jyly elordaǵa kelgen Renat ózin daryndy aqyn ári kınorejısser retinde tanyta bastaıdy. Onyń sózderine jazylǵan ánderdi Astana qalasy Memlekettik fılarmonııasynyń ánshileri oryndaıdy. 2005 jyly ol halyqaralyq «Shabyt» shyǵarmashyl jastar festıvaliniń laýreaty atanady. 2008 jyldan bastap rejısserlik qyzmetpen aınalysyp, «Kóleńke», «Polıgon», «Buzaqy» syndy birneshe tolyqmetrajdy fılmderdi túsiredi.
Alaıda, R.Elýbaev beıneleý ónerin óziniń basty ómirlik isi dep tabady. Qajymaı eńbektengen jas sýretshi ártúrli mánerler men tehnıkalardy ıgeredi. 2012 jyly Astana q. Ortalyq qalalyq kitaphanasynda Renattyń alǵashqy jeke kórmesi ótti. 2013 jyly onyń jumystary Almatydaǵy Ábilhan Qasteev atyndaǵy Qazaqstan Respýblıkasynyń Memlekettik óner murajaıy uıymdastyrǵan «Qazaq halqynyń dástúri, tarıhy jáne poemalary» atty kórmede kópshilik nazaryna usynyldy.
«Kóńil sýreti» kórmesinde avtordyń ımpressıonızm mánerinde oryndalǵan týyndylary usynylyp otyr. Qylqalam sheberiniń qalamynan 2013-2014 jj. týyndaǵan bul eńbekter beıneleý óneriniń barlyq qyr-syryn qamtyǵan jas sýretshiniń ózindik qoltańbasyn tanýǵa múmkindik beredi.
Aıta keteıik, «Kóńil sýreti» kórmesi 23 mamyrǵa deıin jalǵasady.
