Tuńǵysh Prezıdent murajaıynda kóshbasshylyq pen tulǵanyń qalyptasý máseleleri talqylandy
ASTANA. 26 qarasha. QazAqparat - Búgin Qazaqstan Respýblıkasy Tuńǵysh Prezıdenti Murajaıynda «Kóshbasshylyq jáne tulǵa» atty halyqaralyq ǵylymı-tájirıbelik semınar bolyp ótti. Jıyn QR Tuńǵysh Prezıdenti kúni merekesine oraılastyrylyp otyr.
Sharaǵa Májilis depýtattary, Qazaqstandaǵy Ázirbaıjan, Ýkraına elshilikteriniń ókilderi, Bilim jáne ǵylym mınıstrliginiń, Astana qalasy ákimshiliginiń qyzmetkerleri, ǵylymı jáne pedagogıkalyq qaýymdastyqtyń, memlekettik emes uıymdardyń ókilderi qatysty.
Eske salsaq, Tuńǵysh Prezıdent Murajaıy jalpymemlekettik úderiste qazaqstandyq patrıottyq tárbıe berý, qyzmettiń barlyq salasynda áleýmettik beıimdelý men shyǵarmashylyq jaǵynan ózin-ózi tanytýǵa qabiletti tulǵa qalyptastyrý sekildi qyzmetti júzege asyrady. Budan bólek, murajaı óz qyzmetinde Elbasynyń lıderlik fenomenin zertteý men táýelsizdik jyldaryndaǵy Qazaqstannyń jetistikterin nasıhattaý aıasynda murajaı pedagogıkasy baǵyttaryn keńeıtýge de erekshe nazar aýdarady.
«Jastarǵa qaratyp aıtylǵan sózinde Elbasy: «Búgingi tańda óziniń múmkindikterin tolyǵymen júzege asyrý úshin jastarǵa kóp jaǵdaı jasaldy. Ondaıdy biz jas kúnimizde armandaı da almaıtynbyz» degen bolatyn. Rasynda da, búgingi tańda talantyn shyńdaýǵa barlyq múmkindikter qaraldy. Búgingi semınar barysynda osy máselelerge keńinen talqylaımyz. Jalpy bul taqyryptyń aýqymy da mańyzy da zor. Óıtkeni, elimizdiń keleshek sapaly damýy da, onyń órkendeýi de dál osy kásibı jastarǵa, adam kapıtalynyń nátıjesine baılanysty bolmaq», - dedi Tuǵysh Prezıdent Murajaıynyń dırektory Alma Saǵynǵalı.
Jıynǵa qatysýshylar «Kóshbasshylyq jáne tulǵa» aıasynda júzege asqan zertteýler týraly pikirlerin ortaǵa salyp, osy baǵyttaǵy jobalardyń qorytyndylaryn jarııa etti.
