Tuńǵysh Prezıdent murajaıynda Qazaqbaı Ájibekulynyń jeke sýret kórmesi ashyldy
ASTANA. 20 aqpan. QazAqparat - Búgin QR Tuńǵysh Prezıdenti murajaıynda tanymal qazaqstandyq keskindemeshi Qazaqbaı Ájibekulynyń «Oryndalǵan arman» atty jeke kórmesi ashyldy. Kórme 2013 jyldyń 18 naýryzyna deıin jalǵasady, dep habarlaıdy Astana qalasynyń resmı saıty uıymdastyrýshylarǵa silteme jasap.
Q. Ájibekuly - sýretshi-monýmentalıst. Onyń kartınalarynyń basty taqyryby tarıhı mura, kóne jádigerler, uly tulǵalar beınesi men uly oqıǵalar bolyp keledi. Máselen, QR Tuńǵysh Prezıdenti murajaıy jıyntyǵynan «Jeti jarǵy» (2003 jyl) polotnasynda uly tulǵalar beınelengen.
«Kórme ekspozıtsııasy Qazaqstan Respýblıkasy Tuńǵysh Prezıdenti murajaıynyń qorynda saqtalǵan burynǵy jumystary men álemdik qaýymdastyqty tolǵandyrǵan kózqarastar turǵysynan alǵanda adamdy oılandyratyn jańa dúnıelerdi, týǵan halqynyń kórkem jylnamasyn jasaýǵa umtylǵan tyń týyndylardy kórýge múmkindik beredi», - delingen habarlamada.
Qazaqbaı Ájibekuly Elbasynyń shaqyrýymen jas astanaǵa alǵashqy kelgen jas sýretshilerdiń qatarynda. Osy jerdiń týmasy úshin (Qazaqbaı Ájibekuly 1966 jyly Tselınograd oblysy Bestamaq aýylynda dúnıege kelgen) onyń kóz aldynda ótip jatqan ǵajap ózgerister onyń qııalyn qanattandyrmaı qoıǵan joq. Eline, zamanyna degen súıispenshilikten ol dalanyń darqandyǵynan, halqynyń salt-dástúrinen, ultynyń júrip ótken izderinen tereń oılar izdep, túıe bildi.
Uıymdastyrýshylar onyń «Astana tańy» (2003 j.) kartınasynan kórkem oıdyń negizderin kóredi. Onda jańa Qazaqstandy, jańa qoǵamdy, onyń jańa kóshbasshysyn jarqyn keıipte kórsete bilý bar.
Qazir Q.Ájibekuly - tulǵalanǵan avtor, Qazaqstan Sýretshiler odaǵynyń múshesi, kóptegen syılyqtardyń laýreaty. Atap aıtsaq, Á.Qasteev atyndaǵy arnaıy syılyqtyń (1999 j.), «Daryn» Memlekettik jastar syılyǵynyń (2001 j.) ıegeri. Sondaı-aq, ol kóptegen baıqaýlardyń jeńimpazy. 2012 jyly qylqalam sheberi «Qazaqtyń halyq eposy. Qazaq halqynyń tarıhy men dástúrleri» respýblıkalyq baıqaýynyń jeńimpazy atandy.
