Tuńǵysh Prezıdent murajaıynda Aqmola óńiriniń tarıhynan syr shertetin kórme ashylady
ASTANA. QazAqparat - 14 naýryz kúni saǵat 17.00-de QR Tuńǵysh Prezıdentiniń mýzeıinde «Aqmola: tarıh toǵysyndaǵy ólke» atty kórmeniń ashylý saltanaty ótedi, dep habarlaıdy atalmysh murajaıdyń baspasóz qyzmetinen.
Bul kórme Aqmola oblystyq tarıhı-ólketaný mýzeıi, Kókshetaý qalasynyń tarıhy mýzeıi men Ádebıet jáne óner mýzeıleriniń qorlarynan uıymdastyrýymen ótkizilmek.
Ekspozıtsııa mýzeıaralyq seriktestik kórme jobasynyń aıasynda Qazaqstannyń ár aımaǵyndaǵy mýzeılerdiń eń mańyzdy ári biregeı jınaqtaryn kórsetýge arnalǵan. Aǵymdaǵy jyly Aqmola oblysyna erekshe nazar aýdarylyp otyr. Bul óńir tarıhı jáne mádenı muraǵa baı, sondaı-aq ár alýan mádenı aǵymdar legi toǵysqan ólke ekendigimen de erekshelenedi.
Munda kópshilik nazaryna jergilikti kóshpeliler men alǵashqy sharýalar, áskerı kazaktardyń ókilderi jáne deportatsııaǵa ushyraǵan polıaktar men nemister, ǵalymdar men alǵashqy tyń ıgerýshilerdiń mádenıeti usynylmaq.
Aqmola ólkesi sondaı-aq Aqan seri, Birjan sal, Úkili Ybyraı, Balýan sholaq jáne t.b. sııaqty uly aqyndar men kompozıtorlar úshin ónerdiń qaınar bulaǵy bolǵan. Bul týraly Kókshetaý qalasynyń úsh murajaıynyń jádigerleri áńgimeleıdi.
Kórme dástúrli qazaq qoǵamyndaǵy rýhanı qundylyqtardyń tereń tamyrlary men ólke tarıhyndaǵy mádenı alýan túrlilikti aıqyn sezinýge múmkindik beredi.
Aıta keteıik, kórme 14 sáýirge deıin jalǵasady.
