Tuńǵysh Prezıdent kúnine oraı jambyldyq polıtseıler marapattaldy
Jambyl oblysy polıtsııa departamentinde Qazaqstan Respýblıkasynyń Tuńǵysh Prezıdenti kúnine arnalǵan saltanatty jıyn ótti. Sharaǵa jergilikti polıtsııa basshylyǵy men jeke quramy, Іshki ister organdarynyń ardagerleri, qoǵamdyq uıym ókilderi qatysty.
Departamenttiń jeke quramyn jáne ishki ister organdarynyń ardagerlerin merekemen polıtsııa departamentiniń bastyǵy Arman Orazalıev quttyqtap, Tuńǵysh Prezıdenttiń joǵary eńbegin atap ótti.
«Tuńǵysh Prezıdent Nursultan Ábishuly Nazarbaev qoǵamda ádildik pen saıası turaqtylyqty qamtamasyz etýge, eldiń aýmaqtyq tutastyǵyn, onyń tynyshtyǵyn saqtaýǵa úlken úles qosty. Búgin Qazaqstan álemde tanylǵan memleketke aınaldy»,- dedi A. Orazalıev.
Sondaı-aq, saltanatty shara barysynda polıtsııanyń úzdik qyzmetkerlerine vedomstvolyq nagradalar tabys etildi. Saltanatty marapattaý rásimi barysynda qyzmettik mindetterin adal oryndaǵany jáne jumysta joǵary nátıjelerge qol jetkizgeni úshin 20-dan astam adam belgilendi. Olardyń ishinde polıtsııa polkovnıgi ataǵy DP bastyǵynyń birinshi orynbasary Baýyrjan Údergenovke, merziminen buryn, polıtsııa maıory ataǵy kınologııalyq qyzmet ortalyǵynyń aǵa ınspektor - kınology polıtsııa kapıtany Leonıd Anıskovqa berildi. Sol sekildi úsh polıtseı «Quqyq tártibin qamtamasyz etýge qosqan úlesi úshin» medalimen marapattaldy. Sonymen qatar, birqatar polıtsııa qyzmetkerleri tósbelgilermen, ІІM jáne polıtsııa departamentiniń Qurmet gramotalarymen, alǵys hattarmen jáne qol saǵattar túrindegi baǵaly syılyqtarmen marapattaldy.
Saltanatty is-shara sońynda qatysýshylarǵa merekelik kontsert usynyldy. Kontsertte qazaqstandyq kompozıtorlardyń Otanǵa degen súıispenshilik pen patrıotızm týraly ánderi shyrqaldy.
