Tuńǵysh Prezıdent kúnine oraı Astanada toǵyzqumalaqtan «Jas daryn» qalalyq ashyq týrnıri ótedi
ASTANA. QazAqparat - QR Ulttyq sport túrleri qaýymdastyǵy (USTQ) jáne «Toǵyzqumalaq» federatsııasynyń uıymdastyrýymen Tuńǵysh prezıdent kúnine oraı 29 qarasha kúni Astanada 18 jasqa deıingi jasóspirimder arasynda toǵyzqumalaqtan «Jas daryn» qalalyq ashyq týrnıri ótedi. Bul týraly QR USTQ baspasóz qyzmetinen qabarlady.
Týrnırge Astana qalasynyń eń úzdik 32 jas sportshysy qatysady. Jeńimpazdar baǵaly syılyqtarmen jáne arnaıy dıplomdarmen marapattalady.
Toǵyzqumalaq ulttyq sportymyzdyń ishindegi shoqtyǵy bıik, tolyq qalyptasqan sport túri. Ol álemdik mádenıettiń ozyq úlgilerimen boı teńestire alatyn, qazaq halqynyń ejelden kele jatqan rýhanı, logıkalyq oılaý óneri.
QR USTQ toǵyzqumalaq oıynyn joǵary deńgeıde nasıhattap, buqaranyń qyzyǵýshylyǵyn arttyrýdy maqsat etip otyr. Ol úshin túrli yntalandyrý sharalaryn júzege asyratyn bastamalar qolǵa alynýda. Qaýymdastyq tól ónerimizdiń ózge sport túrlerimen ıyq teńestirip, halyqaralyq deńgeıge kóterilýi úshin memlekettiń aıryqsha qamqorlyǵy qajet ekenin eskere otyryp, toǵyzqumalaq janashyrlary men ulttyq sportqa eńbek sińirip júrgen adamdardyń tıisinshe qurmet kórip, laıyqty baǵasyn alýyna múmkindik týdyrýdy kózdeıdi.
Tuńǵysh prezıdent kúnine oraı Astanada jasóspirimder arasynda ótkizilip jatqan ashyq týrnır sol ıgi bastamalardyń iske asa bastaǵanyn bildiredi. Jarystyń basty maqsaty - jastardyń otanshyldyq sezimin nyǵaıtý, ulttyq qundylyqtarǵa, dástúrli sportqa degen súıispenshilikterin qalyptastyrý, toǵyzqumalaq oıynyn jastar arasynda keńinen nasıhattaý.
Jarystyń osy bir ataýly kún qarsańynda ótkizilýi onyń mańyzdylyǵyn arttyryp, týrnırdiń dárejesin kóteredi. Elbasy «Máńgilik el» ıdeıasyna jáne «Zııatker ult-2020» baǵdarlamasyn júzege asyrýǵa ulttyq qundylyqtarymyzdy ulyqtaı otyryp qol jetkize alatynymyzdy aıtqan. Sondyqtan aldaǵy ýaqytta Tuńǵysh prezıdent kúni toǵyzqumalaqtan ashyq týrnır ótkizip turý dástúrge aınalmaq.
Jarys Astana qalasyyndaǵy «Jastar» saraıynda ótedi.
Kúnsultan Otarbaı
