Tuńǵysh Prezıdent kúnine oraı Aqmola oblysynda birqatar jańa nysan ashyldy

KÓKShETAÝ. QazAqparat – QR Tuńǵysh Prezıdent kúnine oraı Aqmola oblysynyń Tselınograd aýdanynda birqatar jańa nysan ashyldy, dep habarlaıdy QazAqparat tilshisi oblystyq ishki saıasat basqarmasyna silteme jasap.

Qajymuqan aýylynda 300 oryndyq mektep paıdalanýǵa berildi. Atalmysh bilim ordasynyń ashylýy aýyldaǵy №4 negizgi mekteptegi úsh aýysymda oqý máselesin sheshedi. Aýmaǵy 5,5 myń sharshy metr eki qabatty ǵımarat aýdandyq bilim bóliminiń balansyna berildi.

«Jańa mektep qazirgi zamanǵy materıaldyq-tehnıkalyq bazamen jabdyqtalǵan. Ǵımartta 23 synyp, lıngafondy-mýltımedııalyq synyp, sport zaly, kitaphana, ashana, medıtsınalyq bólme, 2 ınteraktıvti taqta bar», – deıdi aýdan ákimdigindegiler.

Budan bólek, Qaraótkel aýylynda áleýmettik dúken ashyldy. Ondaǵy azyq – túlik baǵasy bazardaǵydan arzan. Dúken qyzmetkerleri múmkindigi shekteýli jandarǵa azyq-túlikti úılerine jetkizip beredi. Jeti adam jumyspen qamtylyp otyr.

Sonymen birge, Qaraótkel, Qarajar, Qyzylsýat, Shubar, Qyzyljar aýyldarynda jańa streetworkout alańy ashyldy. Al Aqmol aýylynda balalardyń oıyn alańy paıdalanýǵa berildi.