Tuńǵysh Prezıdent kúnine arnalǵan halyqaralyq konferentsııa ótýde
«Biz bıyl Táýelsizdigimizdiń 22 jyldyq merekesin toılaımyz. Bul biz úshin ǵasyrǵa bergisiz, ár aıy jylǵa tatıtyn, jarqyn da sheshýshi kezeńderge toly tutas bir dáýirdi quraıtyn kezeń. Sebebi Qazaqstan Táýelsizdigi babalarymyzdyń uly kúresteri arqyly shyńdalǵan, rýhy arqyly qol jetip oryndalǵan maqsat. Táýelsizdik arqasynda halyqty bir týdyń astyna jınap, birtutas el qylýdy murat etken qazaq arystarynyń uly armandary oryndaldy. Jalpy kez kelgen halyq óz eliniń beıbit ómirin, qaryshtap damýyn tileıdi. Al eldiń ósip-órkendeýi, kemel memleket pen izgi qoǵam qurý talpynysy eń aldymen eldiń basshysymen tikeleı baılanysty. Osy mindetterdi moınyna alǵan, qazaq rýhanı bolmysynyń baı murasyn boıyna sińirgen ulttyń uly - Elbasy Qazaqstan halqynyń mańdaıyndaǵy baǵy, yrys berekesi», - deıdi jıynnyń jalpy otyrysyn ashyp sóz sóılegen Qazaqstan halqy Assambleıasy tóraǵasynyń orynbasary Eraly Toǵjan.
Konferentsııa negizinen bes sektsııa sheńberinde jiktelip, onda etnosaıasattyń ózekti máseleleri, Elbasy N. Nazarbaev saıasatynyń nátıjesindegi etnosaralyq toleranttylyq pen qoǵamdyq kelisimniń biregeı erekshelikteri talqylanýda. Shara aıasynda ulttyq birlik pen qoǵamdyq kelisim jónindegi respýblıkalyq jastar forýmy ótetindigi josparlanyp otyr.
Budan bólek, konferentsııa jumysy «Elim meniń» patrıottyq ánder saıysyna qatysýshylardyń Gala-kontsertimen ulasady, sondaı-aq «Qazaqstan - dostyq besigi» respýblıkalyq foto konkýrsynyń qorytyndysy shyǵarylatyn bolady.
Halyqaralyq konferentsııaǵa memlekettik organdar ókilderi, sheteldik sarapshylar, Parlament depýtattary, mádenıet jáne óner qaıratkerleri, Qazaqstan halqy Assambleıasynyń ǵylymı-sarapshylyq keńesi, etnomádenı birlestikter ókilderi qatysyp otyr.
