Tuńǵysh Prezıdent kúnin atap ótý memleket taǵdyryna tireý bolǵan Ult kóshbasshysyna degen zor qurmet
ASTANA. 27 qarasha. QazAqparat - Bıyl Qazaqstanda alǵash ret 1 jeltoqsan kúni QR Tuńǵysh Prezıdenti kúni - memlekettik mereke retinde atalyp ótilmek. Osyǵan oraı, Eýrazııa ulttyq ýnıversıtetiniń rektory Erlan Sydyqov stýdentter men jastardy merekemen quttyqtady.
«Qazaqstan atty elimizdiń, Táýelsizdik atty basty qundylyǵymyzdyń sınonımine aınalǵan Tuńǵysh Prezıdentimiz Nursultan Ábishuly Nazarbaevtyń táýelsizdik jolynda atqarǵan isteri men el úshin etken eńbegi ushan-teńiz. Elbasynyń táýelsizdik týyn qolǵa ustaǵaly beri álem aldyndaǵy, elimiz halyqtary aldyndaǵy kórsetip kele jatqan ulan-ǵaıyr qajyr-qaıraty qaıran qaldyrady», - deıdi E. Sydyqov.
Ýnıversıtet rektorynyń aıtýynsha, 1991 jyly 1 jeltoqsanda Qazaqstan tarıhynda tuńǵysh ret jalpyhalyqtyq saılaý ótip, el senimin arqalaǵan sarabdal saıasatker, álemdik deńgeıde ózindik orny bar tulǵa N.Nazarbaev Memleket basshysy bolyp saılanǵan bolatyn.
Sonymen qatar, ýnıversıtet basshysy Qazaqstan búginde Ortalyq Azııa elderi ishinde ekonomıkasy, áleýeti damyǵan, álem tanyǵan memleket bolyp daralanǵanyn atap ótti.
«El damýynyń 2030 jylǵa deıingi kezeńge arnalǵan strategııalyq baǵdarlamasy - Qazaqstan-2030 Strategııasyn júzege asyrý, el ekonomıkasynyń damýyna aıtarlyqtaı úles qosqan «Údemeli ındýstrıaldy-ınnovatsııalyq damý» memlekettik baǵdarlamasy, «eýrazııashyldyq» ıdeıasynyń tujyrymdamasyn engizý syndy elimizdiń strategııalyq damý baǵdarlamalary halyqaralyq deńgeıde memlekettiń abyroıyn asqaqtata tústi», - deıdi rektor.
Sonymen qatar, E. Sydyqov memlekettiń irgetasyn qalaǵan Tuńǵysh Prezıdentimizdiń kúnimen barsha stýdentterdi quttyqtaı kele, bolashaǵymyz bekem, memleketimiz berik bolsyn degendi alǵa tartty. «Egemendi elimizdiń aıtýly merekesin atap ótý memleket taǵdyryna tireý bolǵan Ult kóshbasshysyna degen zor qurmet dep bilemin. Elbasy Nursultan Nazarbaev - qazaq halqynyń yntymaqtastyǵyn jarastyryp, búkilálemdik tynyshtyqqa, dúnıejúzindegi halyqtar men memleketter arasyndaǵy kelisimge, dúnıejúzilik mádenıetti, beıbitshilikti arttyrýǵa súbeli úles qosyp, jańa memlekettiń kelbetin qalyptastyrdy, eldiń bolashaǵyn aıqyndap, ekonomıkanyń órleýine erekshe serpilis berdi. El tizginin ustaǵan Elbasymen elimizdiń bolashaǵy baıandy bolatynyna senimimiz mol», - deıdi E. Sydyqov.
