Tuńǵysh Prezıdent kúni: SQO-da 60-tan astam polıtsııa qyzmetkeri marapattaldy

PETROPAVL. QazAqparat – Soltústik Qazaqstan oblysynda Qazaqstan Respýblıkasynyń Tuńǵysh Prezıdenti kúni qarsańynda 60-tan astam soltústikqazaqstandyq polıtseı men ardagerler marapattaldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, memlekettik mereke qarsańynda úlgili qyzmeti, quqyqtyq tártipti qamtamasyz etýge qosqan úlesi úshin oblystyq vedomstvo apparatynyń, qalalyq basqarma, aýdandyq polıtsııa bólimderiniń qyzmetkerleri marapattaldy.

Biriniń sheni ósse, endi birine medal, tós belgi, gramota jáne alǵys hat tabys etildi. Onyń ishinde úsh ardager, eki memlekettik qyzmetshi bar, qalǵany – attestattalǵan quram.

Oblystyq polıtsııa basshysy Marat Tólebaev jeke quramdy quttyqtaı otyra, egemendi elimizdiń zor jetistikterge qol jetkizýi Elbasymyz – Nursultan Nazarbaevpen tikeleı baılanysty ekenin atap ótti.

Soltústikqazaqstandyq tártip saqshylary qatarynda qylmysqa qarsy kúreste, qoǵamdyq tártip kúzetin jáne jol qaýipsizdigin qamtamasyz etýde joǵary kásibı sheberlik tanytqan qyzmetkerler az emes.

60-tan astam qyzmetkerdiń eńbegi aıtýly mereke qarsańynda saltanatty túrde baǵalandy.

Marapattalǵandardyń úsheýi – «QR ІІM úzdik tergeýshisi, anyqtaýshysy men krımınalısi» respýblıkalyq baıqaýyna qatysýshylar.

Tergeý basqarmasynyń asa mańyzdy ister jónindegi aǵa tergeýshisi Sergeı Konıahın, jedel-krımınalıstıkalyq basqarmasynyń aǵa krımınalısi Aleksandr Hlevov pen qalalyq anyqtaý bólimshesiniń aǵa anyqtaýshysy Nazgúl Omarova baıqaýdyń qorytyndysy boıynsha dıplomdar jáne alǵys hattar aldy.

Mereke jáne demalys kúnderi polıtseıler qaýipsizdik pen tynyshtyqty qamtamasyz etý úshin kúsheıtilgen túrde qyzmet atqarady.