Tuńǵysh Prezıdent kúni qarsańynda polıtsııa ardagerlerine tosyn syı jasaldy – SQO
SQO Polıtsııa departamenti baspasóz qyzmetiniń málimetinshe, zeınetkerler Іshki ister mınıstrliginiń vedomstvolyq shıpajaıy - Almatydaǵy «Qazaqstan sanatorııinde» dem alady, densaýlyqtaryn túzeıdi.
Bir top zeınetkerdi «Almaty – Petropavl» poıyzyna áriptesteri - polıtsııa qyzmetkerleri shyǵaryp saldy. Shıpajaıda olar on kún demalady, keshendi em qabyldaıdy. Alys jolǵa shyqqandardyń arasynda 51 jastaǵy Erkebulan Jamuqov ta bar. Erkebulan Amanbaıuly 2013 jyly polıtsııa kapıtany sheninde zeınet demalysyna shyqty. Ol kóp jyldar boıy Tımırıazev jáne Shal aqyn aýdandarynda polıtsııanyń ýchaskelik ınspektory bolyp eńbek etti.
«Polıtsııa departamentiniń basshylyǵyna, ardagerler keńesine maǵan joldama bergeni úshin alǵysym sheksiz. Zeınet demalysyna shyqsaq ta bizdi umytpaıtyndyqtary qýantady. Ardagerler úshin jylda shıpajaılarǵa osyndaı saparlar uıymdastyrylyp turady», - deıdi ishki ister organdarynyń zeınetkeri.
Jolǵa shyqqan ardagerlerdiń jasy 78 ben 51 aralyǵynda.
«Tuńǵysh Prezıdent kúni qarsańynda polıtsııa departamentiniń bastyǵy Marat Tólebaevtyń usynysymen, vedomstvonyń ardagerler keńesiniń qoldaýymen «Qazaqstan sanatorııine» zeınetkerlerimizdiń kezekti legi attandy. Quramynda oblys aýdandarynyń jáne Petropavldyń ishki ister organdarynyń ardagerleri bar. Olarǵa jol kórsetýge, týyndaǵan máseleleri bolsa sheshýge kómektesý úshin departamenttiń kadrlyq saıasat basqarmasynyń ofıtserin birge jiberdik», - dedi SQO PD basshysynyń orynbasary Qapez Dáýletbaev.
Sońǵy jyldary vedomstvolyq shıpajaıda saýyǵý úshin SQO ishki ister organdarynyń 150-den astam ardageri baryp qaıtty. Barlyq saparlar merekege oraılastyrylǵandyqtan, ári kóp jylǵy eńbekteriniń esh ketpeı, memleket tarapynan baǵalanǵandyǵyn túsingendikten jolǵa shyqqan zeınetkerlerdiń kóńil-kúıleri qashanda kóterińki.
