Tuńǵysh Prezıdent kúni - búkil qoǵamnyń Elbasynyń aınalasynda birigýiniń aıǵaǵy - N. Nyǵmatýlın

ASTANA. 26 qarasha. QazAqparat - Tuńǵysh Prezıdent kúni - búkil qoǵamnyń Elbasy Nursultan Nazarbaevtyń aınalasynda birigýiniń aıǵaǵy. Búgin «Qazaqstan Respýblıkasynyń Tuńǵysh Prezıdenti - Elbasy N.Á Nazarbaevtyń Qazaqstandaǵy parlamentarızmdi damytýdaǵy róli» halyqaralyq konferentsııasy barysynda Májilis spıkeri Nurlan Nyǵmatýlın osylaı málim etti.

Eske salsaq, Tuńǵysh Prezıdent kúni qarsańynda ótip otyrǵan sharany Parlament Májilisi uıymdastyrǵan bolatyn. «Bizdiń egemen elimizdiń árbir jetistikteri, árbir jeńisteri eń aldymen, tuńǵysh Prezıdentimiz Nursultan Ábishuly Nazarbaevtyń atymen tikeleı baılanysty. Sebebi Elbasymyzdyń batyl qadamdary men eren erlikteriniń arqasynda Qazaqstanymyz barlyq qıyndyqty jeńip, búkil álem tanyǵan abyroıly memleketke aınaldy», - dedi jıyn barysynda sóz sóılegen spıker Nurlan Nyǵmatýlın. Sondaı-aq Májilis Tóraǵasy Elbasynyń ıdeıalary men maqsattarynyń qazaqstandyq ómir saltynyń negizin qalap, barlyq qazaqstandyqtar úshin jalpyulttyq qundylyqtarǵa aınalǵanyn tilge tıek etti. «Sondyqtan da tuńǵysh Prezıdent kúni barsha qazaqstandyqtardy Elbasynyń qasyna biriktiretin taǵy bir búkil halyqtyq mártebeli mereke bolyp tabylady»,- dedi Májilis Tóraǵasy. Eske sala keteıik, halyqaralyq konferentsııaǵa Qazaqstan Parlamenti Senaty men Májilisiniń depýtattary sondaı-aq tanymal parlamentshiler, Vengrııadan, Germanııadan, Qyrǵyzstannan, Reseıden jáne Túrkııadan sarapshylar men ǵalymdar, memlekettik organ jetekshileri, dıplomatııalyq korpýs ókilderi qatysýda.