Tuńǵysh Prezıdent qory alǵash mektep tabaldyryǵyn attaıtyn 100-den asa balaǵa mektepke qajetti jabdyqtar salynǵan sómkelerdi tabystady
ALMATY. 25 tamyz. QazAqparat /Názıra Eleýhan/ - Biz bul sharany áleýmettik jaǵdaıy nashar otbasylardyń balalary úlken qýanyshpen mektepke barsyn degen tilekpen uıymdastyrýdamyz. Búgingi sharaǵa tek alǵash ret mektep tabaldyryǵyn attaǵaly otyrǵan balalar kelip otyr.
Biz bul saltanatty jaǵdaı olardyń mektepte jaqsy oqýyna yqpal etedi dep úmittenemiz. Bul týraly búgin Almatyda "Mektepke jol" aktsııasy aıasynda ótken qaıyrymdylyq sharasy barysynda QR Tuńǵysh Prezıdenti qorynyń atqarýshy dırektory Bektas Muhamedjanov aıtty.
"Birinshi qyrkúıek - barlyq balalar úshin Bilim kúni. Bul kún mektep jasyna kelgen barlyq bala úshin úlken mereke bolýy tıis. Al, balany mektepke daıyndaý, qajetti zattaryn alý - úlken qarajatty talap etedi. Ol ásirese, kóp bala tárbıelep otyrǵan ata-analar úshin, ne ár túrli jaǵdaımen ómirdiń qıyn jaǵdaılaryna tap bolǵan otbasylar úshin óte qıyn. Bul máselelerdi sheshýdi qolǵa alynǵan "Mektepke jol" aktsııasy ata-analar úshin úlken kómek, balalar úshin úlken qýanysh bolyp otyr",-dedi ol.
Balalardy tolyqtaı bilim alýǵa qamtý maqsatynda ótkizilgen merekelik sharada
qalanyń 100-den asa kópbalaly jáne az qamtylǵan otbasynyń birinshi synypqa baratyn balalaryna mektepke qajetti jabdyqtar jáne ár túrli táttiler salynǵan sómkeler tabys etildi. Ár sómkede Tuńǵysh Prezıdent qory logotıpi bar.
Shara barysynda balalarǵa shyǵarmashylyq uıymdardyń qatysýymen arnaıy daıyndalǵan kontsert usynyldy. Balalar sonymen qatar, elimizdiń damý jolyn kórsetetin "Intellektýaldy pavılonǵa" ekskýrsııa jasady.
Atalmysh shara QR Tuńǵysh Prezıdenti qory men Almaty qalasynyń Balalar quqyǵyn qorǵaý departamentiniń uıymdastyrýymen ótkizildi.
