Tuńǵysh Prezıdent kitaphanasynda «Bitimger: Sırııa túıini» kitabynyń tusaýkeseri ótti
ASTANA. QazAqparat - Búgin «Qazaqstan Respýblıkasynyń dıplomatııalyq qyzmetiniń 25 jyldyǵy: qorytyndylar, jetistikter, bolashaqqa kózqaras» halyqaralyq ǵylymı-tájirıbelik konferentsııasynyń barysynda kórnekti otandyq dıplomat Nurlan Onjanovtyń «Bitimger: Sırııa túıini» kitabynyń tusaýkeseri ótti. Іs-sharaǵa sheteldik dıplomatııalyq korpýstyń ókilderi, saıasatkerler, sarapshylar jáne jýrnalıster qatysty, dep habarlaıdy QR SІM baspasóz qyzmeti.
QR Syrtqy ister mınıstri Qaırat Ábdirahmanov jańa týyndynyń Elbasy Nursultan Ábishuly Nazarbaevtyń sırııalyq daǵdarysty retteý joldaryn izdeýge baǵyttalǵan belsendi áreketteri jáne Elbasynyń Reseı men Túrkııa arasynda 2015-2016 jyldarda oryn alǵan shıelenisti sheshýdegi mańyzdy róline arnalǵandyǵyn atap ótti.
Kitap N. Nazarbaevtyń Máskeý men Ankara arasyndaǵy shıelenisti sheshý, sondaı-aq Sırııadaǵy asa qıyn jaǵdaıdan shyǵý joldaryn izdeý protsesindegi álemdik lıderler men halyqaralyq uıymdardyń basshylarymen suhbattarynan úzindilerge, qyzyqty faktiler men materıaldarǵa qanyq.
Memleket basshysynyń halyqaralyq bastamalarymen qosa alǵanda sırııalyq jáne Reseı men Túrkııa máselelerindegi bitimgerlik belsendiligine taldaý jasaı otyryp, kitaptyń avtory N. Nazarbaevtyń áreketterine halyqaralyq qaýymdastyqta beıbitshilik pen ózara senim ornatýǵa baǵyttaý ıdeıasy sebepshi degen qorytyndyǵa keledi.
Sondaı-aq, kitapta Elbasynyń Islam áleminiń odan ári damýy týraly pikirleri de keltirilgen. Islam Úmbeti ishindegi alaýyzdyq pen ózara janjal sekildi basty qaýip-qaterlerge kóńil aýdarylady. Qazirgi kezeńde musylman memleketteri arasynda jik arta túsýine baılanysty 2016 jyly Islam yntymaqtastyq uıymynyń Ystanbul sammıtinde «Islam álemindegi tatýlastyq» jóninde Qazaqstan men Túrkııa prezıdentteriniń birlesken bastamasynyń ózektiligi artýda.
Іs-sharaǵa qatysýshylardyń pikirlerinshe Elbasynyń «Islam» jáne «Progress» uǵymdary arasynda teńdik belgisin máńgilik ornatý qajettiligi týraly usynysy ýaqtyly jáne keleshek urpaq úshin asa mańyzdy.
Jalpy, «Bitimger: Sırııa túıini» kitaby sırııalyq shıelenistiń 2011 jylǵy bastalýy men 2017 jylǵy maýsymǵa deıingi kezeńin qamtıdy. Onda myna sekildi kóptegen suraqtarǵa jaýap tabýǵa bolady: Astanadaǵy sırııaaralyq kelissózderdiń ótkizilýine kim muryndyq boldy? Máskeý men Ankara arasyndaǵy qarym-qatynastardyń qalpyna keltirýdiń uzaq úderisi qalaı ótti? Barlyq osy úrdisterdegi Qazaqstan Prezıdenti Nursultan Nazarbaevtyń róli qandaı?
Sırııadaǵy daý-janjal jalǵasyn tapsa da, búgingi kúni bul qantógis qaqtyǵysty toqtatýǵa yqpalyn tıgizetin ózgeristi kezeń keldi.
Reseı, Túrkııa men Iran basshylarynyń sırııaaralyq kelissózderdi Astanada ótkizý týraly ýaqtyly bastamasy Sırııada atysty toqtatýǵa jol ashty. Atalǵan memleketter qazirgi kúnderi de bul kelisimderdi júzege asyrý boıynsha kúsh-jigerlerin salýdy jalǵastyrýda. Sonymen qatar, Astana alańy Jeneva protsesine demeý bolyp tabylady. Qazaqstan kelissózderdiń eki alańda da júrgizilýin qoldaıdy.
Janjaldy retteý úshin Sırııa ishindegi jáne syrttaǵy barlyq múddeli taraptar kúsh-jigerlerin biriktirý qajet.
«Bitimger: Sırııa túıini» kitabynyń basty oı ózegi osy.
Kitap tarıhshylarǵa, saıasattanýshylarǵa, stýdentterge jáne saıasatqa qyzyǵatyn barlyq oqyrman qaýymǵa qyzyqty bolady.
