Tuńǵysh Prezıdent kitaphanasy taratyla ma – mınıstr jaýap berdi

ASTANA. QazAqparat – QR Ádilet mınıstri Azamat Esqaraev Nursultan Nazarbaevtyń burynǵy mártebelerimen baılanysty keńse, rezıdentsııalardyń taǵdyry qalaı bolatynyn túsindirdi, dep habarlaıdy QazAqparat tilshisi.

«Elbasy keńsesi, Elbasy kitaphanasy, rezıdentsııalarynyń taǵdyry ne bolady? Almaty oblysyndaǵy aýylyndaǵy múlikter memleket menshigine qaıtaryla ma?» dep surady jýrnalıster mınıstrden.

Azamat Esqaraevtyń sózine qaraǵanda, Prezıdent týraly zań boıynsha endi Nursultan Nazarbaevqa memleket tarapynan qyzmettik saıajaı men páter ǵana tıesili bolýy múmkin.

«Bul másele búgin kúshin joıýǵa usynylǵan zańda kózdelgen. Elbasy týraly zań kúshin joıady. Sondyqtan, zańnamada kózdelgen tártippen osy keńse, taǵy basqa máseleler jan-jaqty qaralady. Al rezıdentsııalarǵa kelsek, eks-prezıdentke memlekettik saıajaı kózdelýi múmkin. Sondyqtan bul zańnama sheńberinde sheshiledi. Sizder aıtyp turǵan Elbasy keńsesi men Tuńǵysh Prezıdent kitaphanasy týraly da zań tártibimen tıisti sheshim shyǵarylady», - dedi Ádilet mınıstri.