Tuńǵysh Prezıdent kitaphanasy «Elbasy. Jastar. Jasampazdyq» jobasyn iske qosty
«Elbasy. Jastar. Jasampazdyq» jobasynyń ataýy Nursultan Nazarbaevtyń 2019 jyldy «Jastar jyly» dep jarııalaýymen baılanysty bolyp otyr.
Joba Elbasynyń shyǵarmashyl ıdeıalaryn dáripteýge, ekskýrsııa uıymdastyrýdyń ádisterin damytýǵa, sonymen qatar, Qazaqstan Respýblıkasynyń Tuńǵysh Prezıdentiniń ómiri men qyzmetin tanystyrýǵa baǵyttalǵan.
«Almaty - Elbasynyń týǵan jeri ǵana emes, munda onyń Qazaq KSR Mınıstrler keńesi tóraǵalyǵynan QR Tuńǵysh Prezıdentine deıingi saıası kóshbasshy retindegi qalyptasý joly bastaldy. Almaty - táýelsizdik tusynda eń yqpaldy sheshimder qabyldanǵan QR egemendiginiń besigi. Atalǵan jobada sol ýaqyttardan syr shertetin muraǵattar bar. Bul - qazirgi jas qazaqstandyqtar mindetti túrde bilýi, oqýy jáne kórýi tıis dúnıeler», - deıdi Elbasy kitaphanasynyń dırektory Ámirhan Rahymjanov.
Joba tusaýkeserinde QR Memlekettik kúzetiniń Prezıdenttik orkestri arnaıy daıyndaǵan plats-kontserttik baǵdarlamamen óner kórsetti. QR Memlekettik kúzeti qyzmeti Qurmet qaraýylynyń rotasy jurtshylyq nazaryna áskerı qoıylymyn usyndy.
«Elbasynyń sheshimimen jarııalanǵan Jastar jyly jastarǵa, stýdentterge zor múmkindik berip jatyr. JOO granttarynyń, syıaqylar men shákirtaqylardyń sany artty. Shetelde bilim alýǵa barlyq jaǵdaı jasalǵan. Munyń barlyǵy bolashaqqa degen senimdi nyǵaıtyp, Qazaqstannyń ilgeri damýyna negiz bolary sózsiz», - deıdi ál-Farabı atyndaǵy QazUÝ rektory Ǵalymqaıyr Mutanov.
Joba aıasynda Ál-Farabı atyndaǵy QazUÝ kitaphanasynda «Ýaqyt tańdaýy» derekti fılmi kórsetildi. Sonymen qatar, Ámirhan Rahymjanov professor-oqytýshylar, doktoranttar jáne magıstranttarmen kezdesip, dáris oqydy.
Sondaı-aq, «Jastar - ult tiregi» keshendi kórmesi qoıylyp, Elbasy kitaphanasyndaǵy arhıv, mýzeı jáne kitaphana jınaqtarynyń materıaldary kórsetildi.
Kórmeniń alǵashqy bóliminde Elbasy esimimen bite qaınaǵan táýelsiz Qazaqstannyń tarıhy arhıv materıaldary, kitaptar men mýzeı jádigerleri arqyly kórsetildi. Jastar atty ekinshi kórme táýelsizdiktiń alǵashqy jyldarynda memlekettik saıasattyń bilim jáne ǵylym salasy halyqaralyq bilim keńistigine ıntegratsııalanýyna jáne dáıekti damýyna baǵyttaldy. Jasampazdyq kórmeniń úshinshi bólimi bolashaqqa baǵyttalǵan Qazaqstannyń damý strategııasyn, qoǵamdyq uıymdardyń, azamattardyń tulǵalyq damýynyń belsendi ómir ustanymyn kórsetedi.
Kóshpeli aqparattyq-ımıdjdik joba aıasynda ekskýrsııalar júrgiziledi. «Tarıhı tańdaý» kóshpeli taqyryptyq ekskýrsııasy Nursultan Nazarbaevtyń komsomol-metallýrgten bastap Ult Kóshbasshysyna deıingi júrip ótken jolyn baıandaıtyn materıaldardyń tolyq keshenimen tanystyrady.
«Qazaqstannyń sporttyq dańqy» taqyryptyq ekskýrsııasy táýelsizdik jyldaryndaǵy elimizdiń sporttyq jetistikterimen tanystyrady. Kelýshiler Elbasy kitaphanasy mýzeıiniń qoryndaǵy N.Á.Nazarbaevqa otandyq jáne sheteldik sportshylar tartý etken syılyqtar toptamasyn, sondaı-aq olardyń jeke zattaryn da kóre alady.
