Tuńǵysh qazaqstandyq olımpıadashy Evgenıı Kadıaıkın Azııa oıyndaryna qatysatyn sportshylarǵa sáttilik tiledi
ALMATY. 27 qańtar. QazAqparat /Názıra Eleýhan/ - Búgin Almatyda Medeý aýdanynyń ákimi Sultanbek Mákejanovpen kezdesý barysynda KSRO-nyń eńbek sińirgen bapkeri, dene shynyqtyrý men sport ozaty jáne Olımpıada oıyndaryna qatysqan alǵashqy qazaqstandyq azamat Evgenıı Kadıaıkın Azııa oıyndaryna qatysatyn sportshylarǵa batasyn berip, sáttilik tiledi.
Astanada ótetin 7-Qysqy Azııa oıyndarynyń ashylýyna qatysatyn búginde 82 jastan asqan sport ardageri kezdesýde Azııa oıyndarynyń mańyzdylyǵyn atap ótip, aýyr júk artyp otyrǵan sportshylarǵa óz tilegin bildirdi. «Men barlyq sportshylarǵa jeńis tileımin! Olar Elbasy, el, halyq artyp otyrǵan senimderin, ásirese bapkerleriniń úmitin aqtaıdy dep oılaımyn. Men óz qyzmet jolymda Qazaqstanda 29, KSRO kezinde 1 rekord jasap, 26 sport sheberin, KSRO-nyń 5 chempıonyn, Qazaqstannyń 150-den asa chempıondaryn daıyndadym. Sondyqtan bapkerler men sportshylardy qandaı jaýapkershilik kútip turǵanyn túsinemin. Sondyqtan bárine sáttilik tileımin!», - dedi tuńǵysh olımpıadashy, sport ardageri Evgenıı Kadıaıkın.
Ol sonymen qatar, Azııa oıyndary barysynda óziniń súıikti hokkeı qurama komandasyna qoldaý bildiretindigin aıtyp, jeńis tiledi.
Kezdesýdi uıymdastyrǵan Medeý aýdanynyń ákimi Sultanbek Mákejanov: «Sport ardagerleri - bizdiń maqtanyshymyz, jastar úlgi alatyn tulǵalarymyz. Sizderdiń jetistikterińiz qazaq sportynyń damýyna úlken úles qosty», - dep atap ótti kezdesýde.
Aýdan basshysy ardagerge densaýlyq tilep, sporttyq kıim men Azıada belgisi bar estelik kádesyılardy tabys etti.
