Tuńǵysh ret kúshtik qurylymdar FPV-dron operatorlary arasynda Millitary Drone Race týrnıri ótti
ASTANA. KAZINFORM — QR Memlekettik kúzet qyzmetiniń bastamasymen 2025 jylǵy 17 sáýirde «Maılan» dalalyq oqý ortalyǵynda Qazaqstanda tuńǵysh ret kúshtik qurylymdar FPV-dron operatorlary arasynda Millitary Drone Race týrnıri ótti.
Saıysqa QR Memlekettik kúzet qyzmeti, QR Ulttyq qaýipsizdik komıteti, QR Іshki ister mınıstrligi, QR Qorǵanys mınıstrligi, QR Tótenshe jaǵdaılar mınıstrligi, t.b. qurylymdardyń komandalary qatysty.
Týrnırdiń seriktesi – «Ashyk Aspan Foundation» bilim jáne ǵylym qory.
Saıys nátıjesinde QR MKQ komandasy jeńimpaz atandy, ekinshi orynda QR UQK «A» arnaıy jasaǵy komandasy, al Radıoelektronıka jáne baılanys áskerı-ınjenerlik ınstıtýty komandasy úshinshi orynǵa ıe boldy.
FPV-drondardy basqarý týrnıri osy saladaǵy mamandardyń kásibı sheberligin damytýǵa baǵyttaldy.
- Saıys olarǵa jańa júıelerdi basqarý daǵdylaryn jetildirip, praktıkalyq tájirıbe almasýǵa múmkindik berdi jáne ushqyshsyz basqarylatyn ushý qondyrǵylaryn taktıkalyq qoldaný salasyn odan ári damytýǵa úlesin qosty deýge bolady, - delingen QR Memlekettik kúzet qyzmeti taratqan habarlamada.
Osyǵan deıin áskerı sherýge baılanysty Almaty men Astana baǵytyndaǵy ushaq reısteriniń kestesi ózgeretini týraly habarladyq.
