Tuńǵysh Prezıdent saıabaǵyndaǵy avtomatty sýarý júıesi jartylaı jumys istep tur
ALMATY. KAZINFORM – Almatyda Tuńǵysh Prezıdent saıabaǵyn jańartý tujyrymdamasy ázirlenip jatyr. Almaty ákimi parktiń keshendi qaıta jańǵyrtý jobasymen tanysty.
Qoǵamdyq keńistikti damytý basqarmasy basshysynyń mindetin atqarýshy Batyrhan Súleımenovtyń málimetinshe, saıabaq 2010 jyly ashylǵan. Onyń aýmaǵy 15 myńnan astam aǵash otyrǵyzylǵan alleıalar men dendrologııalyq aımaqtarǵa bólingen.
Qazir qoldanystaǵy avtomatty sýarý júıesi tek jartylaı jumys istep tur, sondyqtan ony tolyq jańǵyrtý qajet. Zamanaýı tehnologııany qoldanyp, sý aǵyzý qubyrlaryn tazartyp, sýarý júıesin tolyq jańartý josparlanyp otyr.
Jańartý jobasy saıabaqty ornyqty kógaldandyrý tujyrymdamasyn qamtıdy. Atap aıtqanda, aǵash pen butanyń túrin kóbeıtý, alýan túrli shóptesin ósimdikterden turatyn ekojúıeler men jasyl aımaqtar qurý kózdelgen. Olardyń arasynda 4 gektar aýmaqta qaraǵaı men qaıyńnan turatyn toǵaı da bar. Sonymen qatar 5,5 myńnan astam gúldeıtin aǵash egý kózdelgen.
Qala ákimi jobalyq sheshimderdi naqtylap, kógaldandyrý júıesiniń ornyqtylyǵyn qamtamasyz etýdi, sýarý ınfraqurylymyn jańartýdy jáne saıabaqtyń tabıǵatty qorǵaý qyzmetin kúsheıtýdi tapsyrdy.
Basty maqsat dendrosaıabaqtyń ekologııalyq mańyzy joǵary aımaq retindegi mártebesin saqtaý jáne onyń rekreatsııalyq áleýetin damytý.
Osyǵan deıin «Atakent» iskerlik yntymaqtastyq ortalyǵyn qaıta qurý jumystary bastalatyny týraly jazǵanbyz.