Tuńǵysh qazaq ǵaryshqa ushqanyna 33 jyl
ASTANA. KAZINFORM – Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev 33 jyl buryn dál osy kúni ǵaryshqa ushqan tuńǵysh qazaq Toqtar Áýbákirovti aıtýly kúnmen quttyqtady.
Mınıstrlik osydan 33 jyl buryn, 1991 jylǵy 2 qazanda Qazaqstan tarıhynda ǵaryshqa alǵash qadam jasalǵanyn atap ótti. Ǵaryshker Toqtar Áýbákirov Baıqońyr ǵarysh aılaǵynan «Soıýz TM-13» ǵarysh kemesinde ushty. Ekıpaj quramynda ol «Mır» orbıtalyq stantsııasynda bir apta boldy jáne 10 qazanda jerge oraldy. Osy ýaqyt aralyǵynda ol bes ǵylymı eksperıment júrgizdi.
«Toqtar Áýbákirovtiń ushýy qazaqstandyq ǵarysh ǵylymy men tehnologııalaryn damytýdyń sheshýshi sáti boldy. Qazaq ultynyń tuńǵysh ǵaryshkeri retinde onyń jetistikteri Jerdi ǵaryshtan zertteýde jáne Qazaqstanda ǵarysh tehnologııalaryn ázirleýde jańa dáýirdiń bastalýyn bildiredi», — dep atap ótti tsıfrlyq damý mınıstrligi.
Ǵaryshta Aral teńiziniń qumdy daýyldaryn túsirý jáne medıtsınalyq-bıologııalyq zertteýler júrgizildi. Arnaıy azyq-túlik jáne ǵaryshtyq bıotehnologııa muqııat baqylaýdan ótti. Mıkrogravıtatsııadaǵy metall balqymalarynyń áreketi zertteldi. Jerge oralǵan soń, jınalǵan barlyq úlgiler ǵalymdar tarapynan muqııat zerttedi.
Aıta keteıik, Áýbákirov Toqtar Ońǵarbaıuly — tehnıka ǵylymdarynyń doktory, professor, KSRO-nyń 72-shi ǵaryshkeri, KSRO-nyń eńbek sińirgen synaýshy ushqyshy, Qazaqstan Respýblıkasynyń eńbek sińirgen sport sheberi. Qazaqstan áýe kúshteriniń General-maıory. Qazaqstannyń Halyq Qaharmany, Keńes Odaǵynyń Batyry.
