«Túngi stýdııada Nurlan Qoıanbaev» jańa túsirilim bastaldy: Mundaı formattyń bolashaǵy bar
- Nurlan Nuǵmanuly, bes jyl úzilisten soń «Túngi stýdııada Nurlan Qoıanbaev» baǵdarlamasy nelikten Almaty qalasynda túsiriletin boldy?
- Búgin bes jyl úzilisten soń «Túngi stýdııada Nurlan Qoıanbaev» baǵdarlamasy jańa túsirilimin bastady. Jalpy, baǵdarlama elimizde alǵash ret 9 jyl buryn ashylǵan bolatyn. Araǵa bes jyl salyp, búgin Almaty qalasynda qaıta túsirilimin bastap otyrmyz. Negizi biz baǵdarlamany burynǵydaı Nur-Sultan qalasyndaǵy «Qazmedıa» ortalyǵynda túsiremiz dep oılaǵanbyz. Biraq, onda eshbir stýdııa bos emes eken. Sosyn tańdaýymyz Almatydaǵy Qazaq teleradıo ortalyǵynyń apparattyq-stýdııalyq keshenine tústi. Negizi bul jer maǵan óte ystyq. Sebebi alǵashqy jumysymdy osy jerde bastaǵanmyn. Osynda bos stýdııa boldy, biz baǵdarlamany sonda túsiremiz dep sheshtik.
- Baǵdarlamany endi kimder júrgizedi jáne búgingi baǵdarlamanyń burynǵydan qandaı ereksheligi bar?
- Baǵdarlamanyń burynǵydan ózgesheligi ony endi úsh adam júrgizedi. Olar - men, belgili telejúrgizýshi, akter Dáýlet Bıjanov jáne aktrısa qaryndasymyz Saltanat Serkebaeva. Sondaı-aq baǵdarlama formatyn zaman talabyna saı sál ózgerttik. ıAǵnı, qazir ınternette «podkast» formaty jaqsy damýda. Sol sebepti, biz stýdııada úsh júrgizýshi, bir qonaq bolady dep sheshtik. Sondaı-aq, júrgizýshilerdiń sanyn kóbeıtýdegi maqsatymyz - baǵdarlama naǵyz shoý, qyzyqty ári pikirtalas kóbirek bolsyn degenimiz.
- Baǵdarlamaǵa júrgizýshisi retinde qaıta qalaı kelgenińizdi aıtsańyz?
- Maǵan «Jibek joly» telearnasynan usynys tústi. Biraz oılandym. Sebebi, bul jaýapkershiligi mol joba. Ońaı emes. Ózim jýrnalıst bolmaǵan soń, keıde maǵan kelgen qonaqtan suhbat alý qıynǵa soǵyp jatady. Shyǵarmashylyqta júrgen aǵalarymmen, áriptesterimmen aqyldasa kele, usynysty qabyldadym. Búgingi alǵashqy túsirilimde qobaljydym. Sebebi, bul burynǵydaı emes, jańa stýdııa, ishi de basqasha.
- Mundaı túngi shoýlar týraly oıyńyzdy aıtsańyz. Ol álemde jáne Qazaqstanda qalaı damyp keledi? Jalpy, Qazaqstanda baǵdarlamanyń bolashaǵy bar dep oılaısyz ba?
- «Túngi stýdııada Nurlan Qoıanbaev» baǵdarlamasy - «Late night show» formatyndaǵy shoý. Mundaı shoýlar alǵash ret 1960 jyldary AQSh-ta ashylǵan. Qazir ınternet, medıa qansha damysa da, mundaı shoýlardy áli kóp kórermen qyzyǵa qaraıdy. Onyń sebebi, ár zamannyń juldyzy, tanymal adamy oǵan kelip qatysýynda dep oılaımyn. Men Qazaqstanda túngi shoýǵa shaqyratyn qonaqtarymyz kóp ekenine qýandym. Bul elimizdiń, qoǵamymyzdyń myqty ekenin kórsetse kerek. Demek, menińshe bul formattaǵy jobalardyń Qazaqstanda bolashaǵy bar.
- Baǵdarlama qashan kórsetiledi?
- «Túngi stýdııada Nurlan Qoıanbaev» baǵdarlamasy «Jibek joly» telearnasynan aptasyna 4 ret, túngi saǵat 22.00-23.00 arasynda kórsetiledi. Baǵdarlamany Almatynyń jergilikti «Prime band» mýzykalyq toby áýenmen súıemeldeıtin bolady.
- Suhbatyńyzǵa rahmet.
