Túngi klýby órtengen kásipkerdiń paıdasyna 120 mln teńge óndirildi
ORAL. QazAqparat - Oral qalalyq sotynda «Shale» túngi klýby boıynsha qozǵalǵan qylmystyq iske qatysty úkim shyqty, dep habarlaıdy QazAqparat tilshisi.
Atalmysh sottan túsken málimetke qaraǵanda, «RTsKÝ - Ýralsk» JShS-nyń slesar montajnıgi Aleksandr Kalının órt qaýipsizdigi talaptarynyń buzylýyna jol bergen.
A.Kalının 2017 jyldyń qazanynda «Shale» túngi klýbynda eseptegishti aýystyrý kezinde aınalaǵa ushqynnyń taralýyna jol bermeıtin óndiristik jabdyqty qorǵaý qurylǵysyn qoldanbaǵan. Sonyń saldarynan túngi klýb órtenip, qojaıynyna asa iri kólemde, ıaǵnı 120 155 990 teńge shyǵyn keltirilgen.
Oral qalalyq soty A.Kalınındi QR QK 292-baby 2-bóligine (órt qaýipsizdigi talaptaryn buzý) sáıkes aıypty dep tanyp, gaz jabdyǵyna qatysty qyzmetpen aınalysý quqyǵynan 3 jylǵa aıyra otyryp, 2 jyl 6 aıǵa bas bostandyǵynan shektedi.
Jábirlenýshiniń azamattyq talaparyzy qanaǵattandyrylyp, «RTsKÝ - Ýralsk» JShS-dan atalǵan soma óndirildi.
Úkim zańdy kúshine engen joq.
