Túngi klýbtarǵa barǵan elordalyq jasóspirimder anyqtaldy
NUR-SULTAN. QazAqparat - Elordanyń Polıtsııa departamenti kóńil kóterý oryndaryna baryp júrgen kámeletke tolmaǵandardy anyqtady, dep habarlaıdy QazAqparat tilshisi.
«Nur-Sultan qalasynyń polıtseıleri «Ýchaske» jedel-aldyn alý is-sharasyn ótkizý aıasynda kóńil kóterý mekemelerindegi quqyq buzýshylyqtardyń aldyn alýǵa, eskertýge jáne jolyn kesýge baǵyttalǵan is-shara ótkizýde. Jyldyń basynan bastap qala polıtsııasyna kóńil kóterý mekemelerinde, bos ýaqyt ótkizý oryndarynda, sondaı-aq oǵan irgeles jatqan aýmaqtarda jasalǵan qylmystar jáne qoǵamdyq tártipti buzýshylyqtarmen baılanysty telefon arqyly turǵyndar 3,6 myń ret shaǵymdanǵan». - delingen qalalyq Polıtsııa departamenti baspasóz qyzmetiniń málimetinde.
Taldaý kórsetip otyrǵandaı, oıyn-saýyq mekemelerimen baılanysty atalǵan telefon qońyraýlarynyń basym bóligi demalys jáne mereke kúnderine tıesili. Osy oraıda orta eseppen alǵanda kún saıyn 40 habarlama kelip túsedi.
«12-13 sáýirde jedel-profılaktıkalyq is-shara ótkizý nátıjesinde, Nur-Sultan qalasynyń birqatar oıyn-saýyq mekemelerinde 40-qa jýyq ákimshilik quqyq buzýshylyq tirkeldi. Onyń ishinde kámeletke tolmaǵandardyń túngi ýaqytta oıyn-saýyq mekemesinde bolýy, aýmaqty abbattandyrý erejesin buzý, sonymen qatar QR kóshi-qon zańnamasyn buzý jáne basqa da quqyq buzýshylyqtar anyqtaldy», - delingen habarlamada.
Belgili bolǵandaı, Turan dańǵyly boıynda ornalasqan túngi klýbtyń qyzmetkerlerine qatysty Qazaqstan Respýblıkasynyń kóshi-qon zańnamasyn buzǵany úshin 9 ákimshilik hattama toltyryldy, sonymen qatar kámeletke tolmaǵannyń oıyn-saýyq mekemesinde bolýy faktisi anyqtaldy.
Beıbitshilik kóshesi boıyndaǵy karaoke-bardyń ákimshisine qatysty kámeletke tolmaǵan kelýshilerdiń kalıan tartý faktisi boıynsha ákimshilik hattama toltyryldy. Kámeletke tolmaǵandardyń málimetterin ári qaraı tekserý jáne ata-analaryna qatysty ákimshilik hattama toltyrý úshin ıývenaldyq polıtsııaǵa berildi.
