Túngi klýbtar, meıramhanalar: Elordada karantın sharalaryn buzǵan birneshe nysan anyqtaldy
NUR-SULTAN. QazAqparat - Monıtorıng toptar elordanyń tórt aýdanynda kezekti reıd ótkizdi. Tekserý qorytyndysy boıynsha karantın sharalaryn buzǵan ondaǵan meıramhanalar, kafeler men karaoke-barlar anyqtaldy, dep habarlaıdy QazAqparat qalalyq ákimdiktiń resmı saıtyna silteme jasap.
Nur-Sultan qalasynda mobıldi toptar oıyn-saýyq mekemelerine salynǵan tyıymnyń buzylý faktilerin anyqtap, jolyn kesýdi jalǵastyrýda.
Mysaly, Baıqońyr aýdanynda «Sıvyı merın» syra barynda kelýshiler týǵan kúnin túnde atap ótti. «Kedrovyı bor» saýnasynda da ýaqytsha shekteý sharalary elenbedi. Al «Shashlykoff» grıl-barynda mekeme qonaqtary áleýmettik qashyqtyqty saqtamaǵan jáne kalıan paıdalanǵan.
Saryarqa aýdanynda barlyq tyıymdar men sanıtarlyq normalardy elenbeı, 10-ǵa jýyq nysan jumys istedi. Olar: «Aıajan» dúkeni, «Oktoberfest» kafesi, «Qaraqat» kafesi, «Qazyǵurt» kafesi, «207» laýndj-bary, «Ostorojno zlaıa sobaka» kafesi, «Mıaso v teste» kafesi, «Brýno-Bar» resto-bary, «Lýgano» meıramhanasy jáne basqalary.
Osyǵan uqsas jaǵdaı elordanyń basqa aýdandarynda da oryn alǵan. Monıtorıngtik top músheleri atap ótkendeı, shaǵyn jáne orta bıznes nysandarynyń ıeleri tekserý júrgizýge óz tarapynan kedergi keltirip, tekserýshi top múshelerin ishke kirgizbeıdi.
«Qazirgi ýaqytta karantındik sharalardy qasaqana buzǵany úshin elordanyń birqatar túngi klýbtary men qoǵamdyq tamaqtaný nysandaryna qatysty segiz materıal sot qaraýynda jatyr. Buryn atalǵan sýbektilerge buzýshylyqtardy joıý týraly uıǵarymdar berilgen. Quqyq buzýshylarǵa qatysty qyzmetti toqtata turý týraly sot aktisi oryndalmaǵan jaǵdaıda ákimshilik qamaýǵa alý sharalary qabyldanady», - dep habarlady qalalyq prokýratýra.
Elordanyń sanıtarlyq-epıdemıologııalyq baqylaý departamentiniń aqparatyna sáıkes, ótken jyldyń alty aıynda shekteý jáne karantın sharalaryn buzǵany úshin 1 454 jeke, laýazymdy jáne zańdy tulǵalar jalpy somasy 283 616 250 teńgege ákimshilik jaýapkershilikke tartyldy.
