Túngi klýbta jaǵa jyrtysqan boıjetkenge jaza kesildi
QARAǴANDY. QazAqparat - Qaraǵandyda túngi klýbta tóbelesip, jazaly bolǵan 22 jastaǵy qaraǵandylyqqa qatysty sot úkimi shyqty, dep habarlaıdy QazAqparat.
Ótken jyldyń qazan aıynda Qaraǵandydaǵy karaoke klýbynda qyzdar arasynda tóbeles oryn alǵan. Klýbqa ápkesimen birge týǵan kúnin toılaýǵa kelgen qaraǵandylyq tańǵy tórt shamasynda ózge bir boıjetkenmen sózge kelip qalǵan. Názik jandylar ánge tapsyrys berý kezindegi kezekke talasqan. Urys-keristiń sońy jaǵa jyrtysqan tóbeleske ulasady.Bir biriniń shashyna jabysqan eki boıjetken edenge qulap tússe de judyryqtasýlaryn qoımaǵan. Osy kezde 22 jastaǵy aıyptalýshy ekinshi qyzdyń oń aıaǵynan ońdyrmaı tistep alǵan. Sonymen qatar zardap shekken jannyń moıny, qoly, beti syrylǵanjáne denesi men aıaǵy soqqydan qantalap ketken. Osy tóbeleske qatysty qylmystyq isti Qazbekbı aýdandyq soty qaraǵan bolatyn. Qarsylasyn aıamaı soqqyǵa jyqqan aıyptalýshy sotta ózin qorǵaý úshin osyndaı áreketke barǵanyn túsindirgen.
Aqyr sońynda sot aıyptalýshy boıjetkendi QR QK 107 baby 2 bóligi 5 tarmaǵy boıynsha aıypty dep taýyp, oǵan úkim kesti. Sot sheshimimen aıyptalýshyǵa 1 jyl bostandyǵyn shekteý jazasy taǵaıyndaldy. Sonymen qatar aıyptalýshy jergilikti bılik anyqtaǵan oryndarda bir jylda 80 saǵat jumysqa jegiletin boldy.
Qazybekbı aýdandyq sotynyń baspasóz málimetinshe, sot úkimi zańdy kúshine áli engen joq.
Araılym Satybaldyqyzy
