Túngi klýbta tóbeles shyǵarǵan qostanaılyq polıtseıler jumystan qýyldy
QOSTANAI. QazAqparat - Qostanaı oblysy ІІD polıtsııa serjanttary «De Marko» klýbynda tóbeles shyǵardy, dep habarlaıdy QazAqparat oblys ákimdiginiń baspasóz qyzmetine silteme jasap.
Oqıǵa Qostanaıdaǵy «De Marko» túngi klýbynda 2 qazan kúni túnde bolǵan. 4 er adam klýb foıesinde tóbelesip qalǵan. Atalǵan oqıǵa týraly oblys ákiminiń baspasóz hatshysy Jiger Sársenov resmı málimdeme berdi.
«Janjalǵa úsh polıtsııa serjanty men ІІD burynǵy qyzmetkeri qatysqan. Tóbeles kezinde pyshaq qoldanylmaǵan. Qyzmettik tergeý júrgizilip jatyr», - dedi J.Sársenov agenttik tilshisine.
Oblystyq ІІD atalǵan jaıtqa qatysty «Buzaqylyq» baby boıynsha sotqa deıingi tergeý sharalaryn júrgizdi. Nátıjesinde, tóbeleske qatysqan qyzmetkerler oblystyq ІІD bastyǵynyń buıryǵymen jumystan shyǵaryldy.
