Túngi klýbta sharalardy ótkizýge tyıym salynady – Aqtoty Raıymqulova

NUR-SULTAN. QazAqparat – Mádenıet jáne sport mınıstri Aqtoty Raıymqulova koronavırýs ınfektsııasynyń taralý qaýpi aıasynda elimizdegi meıramhanalar men oıyn-saýyq ortalyqtary qalaı jumys isteıtinin aıtyp berdi, dep habarlaıdy QazAqparat tilshisi.

«Jedel áreket etý shtabynda aıtylǵan keńesterdi tyńdap, usynystardy júzege asyrý maqsatynda bas sanıtarlyq dárigerdiń keńesi boıynsha adamdar kóp jınalatyn sharalardan bas tarta turǵan jón. Qandaı jaǵdaı bolmasyn sanıtarlyq-dezınfektsııalyq sharalar oryndalyp, azamattardyń qaýipsizdigin qamtamasyz etý kerek», - dedi mınıstr OKQ-da ótken baspasóz máslıhatynda.

Sonymen qatar, Aqtoty Raıymqulova túngi klýbtarda da sharalardy ótkizýge tyıym salynatynyn jetkizdi.

«Joǵaryda atalǵan usynystar negizinde 13 naýryzda halyq kóp jınalatyn buqaralyq sharalardy ótkizýge tyıym salyndy. Aıtylyp otyrǵan uıymdar, túngi klýbtar – bul reglamentke kiredi. Sol sebepti mundaı mekemelerde sharalardy ótkizýge tyıym salynǵanyn atap ótkim keledi», - dedi ol.

Eske sala ketsek, Densaýlyq saqtaý mınıstri 14 naýryzda elordada ótken baspasóz máslıhatynda Eljan Birtanov Qazaqstanda eki adamnyń koronavırýs juqtyrǵanyn jetkizgen edi. Kóp ótpeı Mılan qalasynan Nur-Sultanǵa kelgen taǵy bir qazaqstandyqtan koronavırýs ınfektsııasy tabyldy.

Keıin Germanııadan ushyp kelgen Qazaqstannyń taǵy bir azamatynan koronavırýs anyqtaldy. Osylaısha bul dertke shaldyqqandar sany 4 adamǵa jetken edi.

Búgin Qazaqstannyń taǵy eki azamatynan koronavırýs anyqtaldy.