Túngi urlyq adam ólimimen aıaqtaldy: Pavlodarda sot úkimi jarııalandy
ASTANA. KAZINFORM — Pavlodar oblysynyń qylmystyq ister jónindegi mamandandyrylǵan aýdanaralyq soty turǵyn úıge zańsyz kirip, adam óltirdi dep aıyptalǵan E.-ge qatysty isti qarady.
Sot anyqtaǵandaı, 2025 jyldyń shilde aıynda sottalýshy Pavlodar oblysy Zarıa aýyly turǵynynyń úıine zańsyz kirgen. Keıin túngi ýaqytta bóten múlikti urlaý maqsatynda taǵy bir úıdiń aýlasyna ótken. Úı ıesi ony baıqap qalǵan soń, E. pyshaq qoldanyp, úı ıesin qasaqana óltirgen.
Qylmystan keıin ol izin jasyrý úshin keıbir zattardy órtep, oqıǵa ornynan qashyp ketken.
Prokýror sottan E.-ge qylmystar jıyntyǵy boıynsha 9 jylǵa bas bostandyǵynan aıyrý jazasyn taǵaıyndaýdy surady.
Al sottalýshy men onyń qorǵaýshysy turǵyn úıge zańsyz kirý baby boıynsha aqtaýdy, al adam óltirý baby boıynsha eń tómengi jaza berýdi ótindi.
Jábirlenýshi tarap sottalýshyny bas bostandyǵynan aıyrýdy talap etti.
— Sot sottalýshynyń kinási jábirlenýshiler men kýálardyń aıǵaqtarymen, sot-medıtsınalyq saraptamalardyń qorytyndylarymen jáne onyń óz kinásin moıyndaýymen dáleldengenin atap ótti. Jazany jeńildetetin mán-jaılar retinde onyń buryn sottalmaǵany, kinásin moıyndap, ókinýi eskerildi. Aýyrlatatyn mán-jaılar anyqtalmady. Nátıjesinde sot E.-ni kináli dep tanyp, qylmystardy biriktirý arqyly 10 jylǵa bas bostandyǵynan aıyrý jazasyn taǵaıyndady. Úkim ázirge zańdy kúshine engen joq, — delingen habarlamada.
Budan buryn Ekibastuzda bir adamdy óltirip, ekinshisine pyshaq jaraqatyn salǵan áıel ustalǵanyn jazǵanbyz.