Túngi ýaqytta kólik shýyn avtomatty túrde anyqtaıtyn júıe engizilýi múmkin
ASTANA. KAZINFORM — Búgin Quryltaı otyrysynda depýtat Kendebaı Adambek Іshki ister mınıstrine saýal joldap, kólik shýyn avtomatty anyqtaıtyn júıe engizýdi usyndy.
— Memleket basshysy «Zań jáne tártip» qaǵıdatyn iske asyrý aıasynda kez kelgen quqyq buzýshylyqqa múldem tózbeýshilik bolýy kerektigin birneshe ret atap ótti. Azamattardyń qaýipsizdigi men tynyshtyǵyn qamtamasyz etý — ýákiletti organdardyń basty mindetiniń biri. Bul ustanym «Ádilet» partııasynyń baǵdarlamasymen de úndesedi. Partııa úshin zań ústemdigi — ádiletti memlekettiń negizgi qaǵıdaty. Al quqyq qorǵaý júıesin jetildirý, eń aldymen, adam múddesin qorǵaýǵa jáne qoǵam qaýipsizdigin qamtamasyz etýge baǵyttalýy tıis, — dedi ol.
Depýtat saýalyna azamattardyń túngi ýaqytta qoǵamdyq tártiptiń jıi buzylýyna qatysty ótinishi negiz bolǵanyn aıtty.
— «Ádilet» partııasynyń baǵdarlamasynda «halyq únine qulaq asatyn memleket» degenimiz — azamattardyń shaǵymyn jaı ǵana tirkep qoıý emes, olardyń kótergen máselesine der kezinde naqty sheshim qabyldap, nátıjesin kórsetý. Búginde turǵyndar dál osyndaı naqty áreketti kútip otyr. Qalalardyń ortalyq kóshesinde mototsıklder men tıýnıng jasalǵan avtokólikterdiń júrgizýshisi ruqsat etilmegen jarysty jıi uıymdastyrady. Olar jyldamdyqty asyryp, pırotehnıka qoldanyp, turǵyn úıler ornalasqan aýmaqta ádeıi qatty shý shyǵarady. Bul másele jol qozǵalysy erejesin buzý aıasynan shyǵyp, qoǵamdyq qaýipsizdikke qatysty máselege aınaldy. Sonymen qatar azamattardyń tynyǵýyna, túngi tynyshtyǵyna teris áser keltiredi, — dedi depýtat.
Kendebaı Adambektiń pikirinshe, quqyq buzýshylar kóp jaǵdaıda jaýapkershilikten tys qalyp jatady. Onyń birneshe sebebi bar.
— Birinshiden, mundaı quqyq buzýshylyqtar óte sırek tirkeledi. Kóp jaǵdaıda shara azamattardyń shaǵymynan keıin ǵana qabyldanady. «Ádilet» partııasynyń baǵdarlamasynda tsıfrlandyrý azamattardyń ómirin jeńildetip, memlekettik organdardyń jumysyn tıimdi etý quraly retinde qarastyrylady. Máseleni sheshýdiń bir joly — shý deńgeıiniń shamadan tys kóterilýin avtomatty túrde tirkeıtin akýstıkalyq júıe ornatý. Shetelde mundaı tásilder qoldanylady. Mysaly, AQSh-ta avtomatty akýstıkalyq kameralar paıdalanylady. Keı jaǵdaıda kólikti tárkileý de qarastyrylǵan. Germanııa men Frantsııada túngi reıdter ótkizilip, arnaıy jyljymaly zerthanalar qoldanylady, — dedi depýtat.
Onyń atap ótýinshe, ekinshiden, qoldanystaǵy jazanyń tıimdiligine qatysty másele bar.
— Qazir túngi ýaqytta tynyshtyqty buzǵany úshin 5 AEK, ıaǵnı 21 625 teńge aıyppul salynady. Mundaı jaza quqyq buzýshylyqty toqtatýǵa jetkilikti áser etpeýi múmkin. Usynylyp otyrǵan sharalardyń maqsaty — zań talabyn saqtaý, halyqtyń pikirin eskerý jáne azamattarǵa qajet tsıfrlyq sheshimdi damytý. Bul «Ádilet» partııasynyń negizgi ustanymymen úndesedi, — dedi Kendebaı Adambek.
Osyǵan baılanysty ol mınıstrlikke mynadaı usynysqa qatysty ustanymyn bildirýdi surady:
— ruqsat etilgen shý deńgeıiniń asyp ketýin avtomatty túrde anyqtaý úshin arnaıy akýstıkalyq qurylǵylar men shý ólshegishterdi foto jáne beınetirkeý júıesine biriktirý boıynsha pılottyq jobany iske qosý;
— túngi zańsyz jarystardyń jolyn jedel kesý jáne kólikterdiń shyǵarý júıesine zańsyz ózgerister engizilgenin tekserý úshin patrýldik polıtsııa men ýchaskelik ınspektorlardan turaqty birlesken ekıpajdar qurý.
— kólikke zańsyz engizilgen tehnıkalyq ózgerister tolyq joıylǵanǵa deıin quqyq buzýshynyń kólik quralyn arnaıy turaqqa qoıý.
— túngi ýaqytta tynyshtyqty buzǵany úshin belgilengen jazanyń onyń saldaryna jáne azamattardyń qalypty ómir súrýine tıgizetin áserine qanshalyqty saı keletinin qaıta qaraý.
— joldaǵy quqyq buzýshylyqtardy usaq buzaqylyq retinde saralaýdyń naqty tártibin ázirleý, bul rette qoǵamdy ádeıi jáne ashyq túrde qurmettemeýdiń naqty belgisin, sondaı-aq dáleldemelerdi jınaý tártibin belgileý.
Aıta keteıik, keshe Úkimet otyrysynda Premer-mınıstr Oljas Bektenov jol erejelerin qasaqana buzǵandarǵa aıyppul mólsherin eselep arttyrý qajettigin aıtty.
